Romelu Lukaku është i mendimit se futbollistët mund të bëjnë shumë më shumë në luftën kundër racizmit, sesa thjesht të ulin gjurin në shenjë simbolike, përpara startit të ndeshjeve. Ylli i Chelsea ka kërkuar që kompanitë e mediave sociale të takohen me lojtarët, për t’i dhënë fund abuzimeve dhe fyerjeve raciste online. Sulmuesi i kombëtares belge ka deklaruar:
“Mendoj se mund të mbajmë qëndrime më të forta. Të gjithë po ulin njërin gju në shenjë proteste, njerëzit duartrokasin, dhe pas ndeshjes vjen një tjetër ofendim. Duhet të ulemi rreth një tavoline të përbashkët, për të diskutuar se si mund ta luftojmë më drejtpërdrejt problemin. Kjo vlen jo vetëm për futbollin e meshkujve, por dhe atë të femrave.”
Shoku i skuadrës së Lukaku te Chelsea, Marcos Alonso, tha se që sot e tutje nuk do të përdorë më simbolikën e uljes së gjurit përpara ndeshjes. Futbollisti tha se kjo gjë po e humbet impaktin e saj, dhe do të përqëndrohet duke shpërndarë mesazhe anti-racizëm në një formë tjetër. Sulmuesi i Crystal Palace, Wilfried Zaha ka ndjekur pak a shumë të njejtin qëndrim prej kohësh.
Para disa muajsh, klube europiane, lojtarë dhe disa federate, ndërmorën një bojkot 4-ditor në mediat sociale, për të protestuar kundër nivelit të ulët të ndërgjegjësimit për këtë problem gjithnjë e më në rritje.
Ndërkohë Lukaku gjithashtu shtoi:
“Nëse do vërtet të ndalësh diçka mund ta bësh. Ne si lojtarë mund të bojkotojmë mediat sociale, por mendoj se janë kompanitë ato që duhet të vijnë dhe të flasin me ekipet, lojtarët apo qeveritë, për të gjetur një mënyrë për ta ndalur. Mendoj që ata vërtet mund ta bëjnë këtë gjë. Futbolli është lumturi, ai sjell gëzim dhe nuk duhet të jetë një hapësirë që të bën të ndihesh jo i sigurt, për shkak të opinioneve të disa njerëzve të paedukuar.”