Ishte momenti që të gjithë fansat e futbollit po e prisnin. Lionel Messi shënoi golin e tij të parë me fanellën e PSG, dhe realizimi erdhi përballë Manchester City-t të ish-trajnerit të tij, Pep Guardiola. Ky ishte goli i parë në karrierën e argjentinasit, me një fanellë tjetër nga ajo e Barcelonës. Në këtë mënyrë, superstari më i ri i PSG, i dha fund 264 minutave pa gol, që prej ardhjes së tij në Francë. Për më shumë, parizienët fituan 2-0 takimin përballë “qytetarëve”.
Argjentinasi, i cili ishte dukshëm i emocionuar nga kjo arritje, tha për mediat pas ndeshjes:
“Mund të them se është e vërtetë që po bëhesha gjithnjë e më i dëshpëruar për të gjetur golin e parë. Nuk kisha luajtur shumë minuta së fundmi dhe kisha zhvilluar vetëm 1 ndeshje këtu në shtëpi. Por, po filloj të zë vendin tim në skuadër pak nga pak.”
Messi shtoi:
“Sa më shumë që ne sulmuesit e skuadrës të luajmë së bashku, aq më e mirë do të jetë marrëdhënia jonë. Duhet të rritemi së bashku, të përmirësohemi, dhe të vazhdojmë të japim më të mirën tonë.”
Pas takimit, as trajneri Pochettino nuk mund të fshihte entuziazmin:
“Zakonisht nuk i festoj golat, e mbaj gëzimin për vete. Por sot e bëra për Messin. Kam kaluar vite të tëra duke parë Messin të shënojë gola nga prespektiva e kundërshtarit të tij. Prandaj kësaj rradhe, kur shënoi për ekipin tim, ishte fantastike.”
Vet Guardiola u detyrua të pranonte humbjen, duke shprehur admirimin e tij për ish-numrin 10 të Barcelonës:
“Të gjithë e dimë se është e pamundur të kontrollosh Leon për 90 minuta. Ai nuk e qarkulloi shumë topin gjatë takimit, por kur e kishte në këmbë ishte i pandalshëm.”
