Trajneri i Arsenal, Mikel Arteta, është shprehur se është mjaft e rëndësishme që klubet të kujdesen për fansat e tyre, pas refuzimit të Arsenal ndaj idesë së Superligës Europiane. Superliga është një projekt i ri sportiv që përfshinte fillimisht 12 klube kur u prezantua në vitin 2021, mes tyre dhe Arsenal. Megjithatë, propozimi i Superligës shkaktoi mjaft reagime negative nga fansat, UEFA dhe vet klubet europiane, gjë që solli rënien e idesë brenda pak ditëve.
Megjithatë, Gjykata Europiane e Drejtësisë u shpreh para dy ditësh se asnjë autoritet nuk mund të ndalojë klubet që t’i bashkohen një tjetër kompeticioni, gjë që risolli propozimin e A22 për Superligën në skenë. Real Madrid dhe Barcelona deri më tani, janë të vetmet klube që janë zyrtarisht pro idesë së kompeticionit të ri. Ndërkohë, klubet angleze, përfshi këtu dhe Arsenal, kanë shprehur se qëndrimi i tyre në lidhje me këtë cështje nuk ka ndryshuar, pavarësisht vendimit më të ri.
Trajneri Arteta u shpreh:
“Fansat e futbollit dhe pasioni që ata sjellin në ndeshje është arsyeja se përse loja u përket atyre. Opinioni i tyre është mjaft i rëndësishëm, dhe duhet të kujdesemi për ta. Ne mbetemi në të njejtin pozicion, na pëlqen shumë të luajmë në Champions League dhe do të vazhdojmë të bëjmë të njejtën gjë.”
Ndërkohë, pas vendimit të gjykatës, një reagim interesant erdhi nga presidenti i Napoli, Aurelio De Laurentiis. Ky i fundit duket se ka mirëpritur idenë e një kompeticioni të ri. De Laurentiis komentoi:
“Sot futbolli administrohet nga njerëz të moshuar, por mbi të gjitha ata janë pa vizion. Ata që na kanë qeverisur deri më sot si monopol nuk e kanë kuptuar se futbolli është një biznes dhe ka nevojë për të ardhura rritëse. Tani duhet të mendohemi seriozisht…”
