Pas kritikave për gjyqtarët dhe sistemin VAR në humbjen kontroversiale ndaj Newcastle, trajneri i Arsenal, Mikel Arteta, ka përsëritur dhe një herë tjetër qëndrimin e tij për momentin që shkaktoi mjaft debat në Angli. Spanjolli duket se është përsëri i të njejtit mendim, teksa u shpreh dhe një herë se vendimi për t’i akorduar golin Newcastle ishte i papranueshëm dhe i turpshëm.
Reagimi i dytë i teknikut të Arsenal, erdhi pas disa kritikave ndaj tij nga komentatorë të ndryshëm sportivë, përfshi këtu dhe Gary Neville. Ky i fundit i cilësoi komentet e Arteta sit ë rrezikshme për lojën dhe të papranueshme. Megjithatë, tekniku spanjoll ka përsëritur:
“Kjo është detyra ime, të jem këtu përballë jush dhe t’ju jap një përcaktim të pastër dhe të qartë. Të mbroj lojtarët dhe klubin tim në mënyrën më të mirë të mundshme është detyra ime. Do ta bëj gjithmonë dhe do të marr përgjegjësinë. Ky jam unë. Duhet të mbroj klubin tim.”
Arteta gjithashtu shtoi:
“Ne kemi një detyrë për t’u shprehur sesi ndihemi bazuar në provat që kemi. Duhet të mbrojmë njerëzit tanë, vlerat tona dhe atë që ne përfaqësojmë. Deklarata e klubit tregon unitetin dhe bashkimin në një mënyrë të qartë dhe të ndershme… Nuk është asgjë speciale (deklarata e klubit). Unë do ta bëja përsëri, dhe klubi do ta bënte përsëri, derisa kjo të rregullohet.”
Humbja përballë Newcastle i dha fund ecurisë pozitive të Arsenal, që ishte i pamposhtur deri më tani në Premier League. Londinezët janë tashmë 3 pikë larg kryesuesëve të Manchester City, që mbajnë vendin e parë në kampionat, pas disfatës së Tottenham ndaj Chelsea. Gjithsesi, ka ende shumë ndeshje për t’u luajtur dhe gara në Premier League pritet të jetë po aq e ashpër dhe këtë sezon, sa sezonin e kaluar.
