Trajneri i Arsenal, Mikel Arteta, ka komentuar mbi garën për titull në Angli dhe rivalitetin me ndjekësit më të afërt, Manchester City. Tekniku spanjoll tha se do të preferonte të mos garonte përballë Pep Guardiolës për titullin kampion në Premier League, duke vlerësuar kështu ish-kolegun e tij.
2 teknikët spanjollë kanë luajtur së bashku tek Barcelona, përpara se të bashkëpunonin tek Manchester City, ku Arteta kishte rolin e asistentit të Guardiolës. Më pas, Mikel u largua nga “qytetarët” në vitin 2019 për t’u bërë trajner i Arsenal. Londinezët po kalojnë një moment fantastik në Premier League, teksa kryesojnë renditjen e përgjithshme me 5 pikë diferencë nga City, si dhe me një ndeshje më shumë në dorë. Arteta komentoi së fundmi për mediat:
“Është një ndjesi e çuditshme. Dua më të mirën për të (Guardiolën), sinqerisht, kur je në garë me dikë si ai, diçka hyn në mes të kësaj ndjesie. Gjithmonë kisha shpresuar se do të garonim për trofe një ditë dhe po ndodh këtë sezon. Kjo nuk do të ndryshojë miqësinë time, momentet që kemi kaluar, sa i rëndësishëm është ai në jetën time dhe në profesionin tim.”
Arteta shtoi:
“Të dy jemi të gatshëm të fitojmë dhe të mbrojmë klubin tonë me çdo gjë që është e mundur, dhe kjo ka qënë kështu që ditën e parë. Por, do të preferoja të garoja përballë dikujt tjetër.”
Arsenal ende nuk është përballur me Manchester City në kampionat, dhe 2 ndeshjet janë parashikuar të luhen në 15 shkurt dhe 26 prill. Sipas të gjitha gjasave, takimet do të jenë deçizive përsa i përket titullit kampion.
Arteta ndërkohë nuk përjashtoi mundësinë e një tjetër afrimi në këtë merkato janari, kësaj rradhe në repartin e mesfushës, ku nevojat janë më të mëdha sipas teknikut spanjoll. Deri më tani, Arsenal ka afruar 2 lojtarë të rinj këtë merakato, sulmuesin Leandro Trossard nga Brighton dhe mbrojtësin Jakub Kiwior nga Spezia në Itali.