Sipas trajnerit Mikel Arteta, Arsenal ndodhet në një situatë të vështirë dhe të paprecedentë, pas 2 humbjeve në startin e Premier League. Londinezët pësuan disfatë në shifrat 2-0 përballë Chelsea dhe Brentford, duke mos arritur të shënojnë asnjë gol në 2 ndeshjet e para të kampionatit, për herë të parë në historinë e tyre.
Sikur të mos mjaftonte kjo, skuadra është përfshirë nga dëmtimet, ndërsa disa lojtarë të tjerë kanë rezultuar pozitiv me Covid 19. Arteta u shpreh mbi situatën:
“Nuk mendoj se klubi është përballur me diçka të tillë më përpara në historinë e tij. Duhet të përballemi me këtë sfidë. Kampionati apo renditja nuk përcaktohet në gusht. Gjëja më e keqe që mund të bësh është të dorëzohesh që në këtë moment. Sigurisht që nuk kemi për ta bërë këtë gjë.”
Arsenal ndodhet momentalisht në zonën e rënies nga kategoria, për herë të parë që prej gushtit të vitit 1992, në startin e një sezoni të ri. Arteta u shfaq i ndërgjegjshëm për këtë fakt, dhe paraqiti arsyet e tij për performancën e ekipit:
“Duhet të kuptoni situatën në të cilën jemi. Na mungojnë 9 lojtarë, dhe është e vështirë. Nuk janë thjesht 9 futbollistë, janë 9 lojtarë shumë të rëndësishëm.”
Ndër lojtarët që nuk janë të disponueshëm për “topçinjtë” janë dhe 2 yjet e tyre të sulmit, Pierre-Emerick Aubameyang dhe Alexandre Lacazette. Ndërkohë Willian dhe portieri rezervë Alex Runarsson mungojnë për shkak të Covidit. Ben White gjithashtu ka rezultuar pozitiv. Ndërkohë Thomas Partey, Gabriel dhe Eddie Nketiah janë po ashtu në listën e dëmtimeve. Në përfundim të ndeshjes me Chelsea, tifozët e Arsenal u dëgjuan teksa brohorisnin kundër skuadrës së tyre, por kjo gjë duket se nuk e shqetëson trajnerin Arteta:
“Kur humbet nuk mund të presësh që ata të jenë të lumtur. Fansat kanë dhënë të gjithë mbështetjen që mund të jepnin. Kur ne nuk fitojmë, ata duhet të shfaqin pakënaqësinë e tyre dhe është normale.”
