Në një intervistë të fundit për mediat, ylli brazilian Neymar është shprehur se niveli i kampionatit saudit mund të jetë që tani më i fortë se ai i Ligue 1. Sulmuesi u largua nga PSG gjatë merkatos së verës për t’iu bashkuar Al-Hilal në një aventurë të re. Duke marrë parasysh dhe superstarët e tjerë që zgjodhën kampionatin arab këtë verë, si destinacionin e tyre të rradhës, Neymar komentoi:
“Nuk do të isha i surprizuar nëse liga saudite është që tani më e fortë se kampionati francez… Mund t’ju siguroj se futbolli në Arabinë Saudite është njësoj si kudo. Topi është i rrumbullakët… nuk ka asnjë sekret. Kemi seanca stërvitore intensive dhe uria për të fituar është ende e madhe. Dua të fitoj trofe me Al-Hilal. Nuk ka asnjë ndryshim.”
Klubet arabe shpenzuan në këtë merkato mbi 700 milionë paundë për të siguruar shërbimet e lojtarëve që aktivizohen në kampionatet europiane. Vetëm kampionati anglez regjistroi shifra më të larta, gjë që tregon vendosmërinë e klubeve arabe për të rritur nivelin e futbollit në vend.
Ndërkohë, shumë trajnerë dhe personazhe të sportit kanë kritikuar arabët, për faktin se merkatoja e tyre mbyllet një javë më vonë pas asaj europiane. Problemi qëndron me faktin se klubet arabe mund të vazhdojnë të tërheqin vëmendjen e lojtarëve europianë, edhe kur këta të fundit të jenë duke luajtur në kampionatet respektive. Trajneri i Liverpool, Jurgen Klopp, ka nënvizuar rëndësinë për të mbrojtur lojën dhe kampionatet europiane, duke e cilësuar qasjen e klubeve arabe në merkato si një kërcënim.
Kujtojmë se klubet arabe ishin gati të thyenin rekordin për lojtarin më të shtrenjtë në histori, pas ofertës prej 259 milionë paundëve për Kylian Mbappe. Megjithatë, superstari francez e refuzoi propozimin e Al-Hilal, duke zgjedhur të qëndrojë në Paris.
