E ardhmja e Kylian Mbappe është shndërruar në titullin kryesor për të gjitha mediat sportive këtë merkato verore. Ylli francez ka refuzuar të firmosë një kontratë të re me PSG, dhe kjo ka bërë që klubi francez ta nxjerrë atë në shitje, duke pritur kështu oferta për kartonin e Mbappe.
Por cili do të jetë destinacioni i rradhës për sulmuesin e talentuar?
Klubi saudit Al-Hilal ka shokuar botën e futbollit, duke bërë një ofertë stratosferike prej 259 milionë paundë për fituesin e kupës së botës. Sipas mediave franceze Mbappe nuk dëshiron të luajë në Arabinë Saudite, të paktën në këtë moment në karrierën e tij. Kjo pavarësisht faktit se lojtari mund të fitojë deri në 700 milionë euro brenda një viti, duke përfshirë këtu pagën, kontratat me sponsorat si dhe të drejtat e imazhit. Eksperti francez i futbollit, Julien Laurens, ka komentuar:
“Ai nuk do të shkojë atje (Al Hilal). Për të nuk kanë rëndësi paratë. Ai do të fitojë të gjitha trofetë e mundshme. Tani për tani, në moshën 24 vjeçare, këtu nuk përfshihet liga saudite.”
Por nëse nuk zgjedh Arabinë Saudite, ku do të përfundojë Mbappe? Real Madrid është prej kohësh ekipi numër 1 në preferencat e Mbappe, dhe francezi është përfolur së fundmi se ka arritur një akord të fshehtë me Madrid, për transferimin në verën e ardhshme. Gjithsesi, lojtari i ka konsideruar këto raportime gënjeshtra. Chelsea, Manchester United, Tottenham, Inter Milan dhe Barcelona gjithashtu kanë shprehur interes për kartonin e Mbappe.
Pavarësisht se gati asnjë prej këtyre klubeve, nuk mund t’i ofrojë Mbappe një kontratë si ajo aktuale me PSG, francezi është i ndërgjegjshëm për këtë fakt, dhe klubet po përgatisin ofertat e tyre. Barcelona shpreson tek një shkëmbim i mundshëm lojtarësh, duke u nisur nga pamundësia për të bërë një ofertë direkte për shërbimet e Mbappe.
Kjo është strategjia dhe e disa klubeve të tjera, por Real Madrid mbetet ekipi favorit për të firmosur me Mbappe. Kjo pasi madrilenët kanë financat e duhura për operacionin, prestigjin, si dhe Mbappe ka dëshirë të luajë për ta.