Mbrojtësi i Argjentinës, Nicolas Tagliafico, i ka thurrur lavde Lionel Messit, duke thënë se kapiteni i ekipit do të jetë një avantazh i veçantë në sfidën e argjentinasve ndaj Kroacisë. Amerikano-latinët janë frymëzuar tejmase nga aftësitë e jashtëzakonshme të “pleshtit” në rrugëtimin e tyre deri në gjysmëfinale, dhe kjo pritet të ndodhë sërish ditën e nesërme. Tagliafico ndërkohë u shpreh:
“Ai (Messi) ka qënë gjithmonë kështu. Ai është kapiteni dhe lideri jonë. Na shtyn përpara dhe na motivon të gjithëve. Ai është lojtari që na jep avantazhin special kur jemi në fushë. E dimë që kemi Messin dhe është një burim i madh motivimi dhe shprese, pasi të gjithë e dimë se mund të kontribuojmë dhe të japim më të mirën tonë.”
Tagliafico shtoi:
“Me suportin e të gjithëve po punojmë së bashku për të realizuar ëndrrat tona, dhe është gjëja më e bukur ta bësh me Messin në krahun tënd.”
Kroacia nga ana tjetër do të tentojë të arrijë finalen e dytë rradhazi në një Kupë Bote, pas zhgënjimit ndaj Francës në botërorin e 2018-ës në Rusi. Trajneri i kroatëve, Zlatko Dalic u shfaq i qetë, teksa komentoi për mediat në prag të sfidës:
“Nëse fitojmë neser do të ishte ndeshja më e madhe e të gjitha kohërave në historinë e Kroacisë. Jemi ndër 4 ekipet më të mira në botë, ky është një sukses i jashtëzakonshëm… Duam më shumë. Po luajmë përballë një Argjentine të madhe, një ekip fantastik i drejtuar nga Leo Messi. Ata janë shumë të motivuar, por dhe më në presion se Kroacia në këtë pikë.”
Sipas të gjitha gjasave, kjo do të jetë Kupa e Botës e fundit për Leo Messin, që kërkon të sjellë në shtëpi trofeun prestigjoz, që nuk është fituar nga Argjentina prej vitit 1986.