Zëvëndës presidenti i Juventus, Pavel Nedved ka siguruar fansat mbi të ardhmen e Paulo Dybala dhe Cristiano Ronaldo. Sipas tij, ka ende shumë kohë për të diskutuar një kontratë të re me Dybala, ndërsa Ronaldo do të vazhdojë të jetë pjesë e italianëve.
“Zonja e Vjetër” startoi sezonin e ri me një fitore 3-1 ndaj Cesena, në një ndeshje miqësore. Megjithatë, shumë prej yjeve të skuadrës nuk ishin pjesë e formacionit. Vet argjentinasi Dybala u detyrua të ndjekë takimin nga stoli, për shkak të një dëmtimi muskular.
Në ditët e ardhshme, pritet që agjenti i lojtarit të takohet zyrtarisht me drejtuesit e klubit, për të diskutuar një rinovim të mundshëm të futbollistit. Nedved deklaroi për mediat:
“Drejtori Cherubini është në kontakt me agjentin e tij (Dybalas), i cili do të mbërrijë në Torino javën e ardhshme për të diskutuar. Kemi kohë për t’i dhënë zgjidhje situatës, nuk ka asgjë për t’u shqetësuar.”
Nedved u pyet gjithashtu mbi fatin e Cristiano Ronaldo, i cili është përfolur prej kohësh për një lëvizje drejt PSG. Gjithsesi zëvëndës drejtori i Juventus u tregua i shpejtë duke i dhënë fund thashethemeve:
“Ronaldo do të rikthehet në stërvitje me klubin të hënën dhe do të qëndrojë me ne.”
Ndërkohë, mjaft interesante është dhe situata me Giorgio Chiellini. Mbrojtësi që u shpall kampion Europe me Italinë tashmë është një lojtar i lirë pasi kontrata e tij skadoi që në datë 30 qershor. Agjenti i lojtarit, në komunikimin e fundit me mediat u shpreh se ende nuk ka bisedime me klubin. Nedved nuk dha një përgjigje të sigurt mbi fatin e Chiellini, por tha se Juventus do të përfshihet në bisedime, sapo lojtari të kthehet nga pushimet.
Këtë sezon të ri, Juventus do të drejtohet përsëri nga Max Allegri, i cili iu rikthye klubit në mënyrë surprizë.
