Trajneri i Manchester City, Pep Guardiola, ka thënë se Jack Grealish do të kthehet në formacionin titullar të ekipit, kur performancat e tij të përmirësohen. Grealisht ka startuar në vetëm 19 përballje me City këtë sezon, duke përfshirë këtu 7 takime në Premier League. Sezonin që lamë pas, Grealisht startoi në 41 ndeshje gjithsej me “qytetarët”, përfshirë këtu dhe finalen e Champions League.
Guardiola ka komentuar mbi aktivizimin e Grealish:
“Ai është i njejti lojtar, ka të njejtin trajner, dhe mënyra se si ne luajmë nuk ka ndryshuar. E gjitha ka të bëjë me performancën e tij. Kjo është diferenca… E kam thënë që ditën e parë, ai na duhet. Grealish ka kualitete speciale për skuadrën tonë. Por e gjitha varet nga ai. Shpresojmë që të ketë një formë të mirë në 3 muajt e fundit.”
Megjithatë, Grealisht nuk është i vetmi lojtar që e ka patur të vështirë të sigurojë vendin e titullarit në një ekip të drejtuar nga Guardiola. Tekniku spanjoll është mjaft strikt kur vjen fjala tek detajet mbi performancën e lojtarëve të tij, dhe ia ka bërë dhe një herë të qartë Grealish, se anglezi nuk do ta ketë të lehtë të rikthehet në formacion. Pep shtoi:
“Unë nuk mund t’ju jap lojtarëve 3 ose 4 ndeshje për të gjetur ritmin e tyre. Ata duhet ta bëjnë këtë për 20 ose 90 minuta. Në një nivel të lartë, skuadra nuk pret për të gjetur ritmin. Nuk mund t’i japësh dikujt 3 ose 4 takime për të gjetur formën e mirë. Po ata 10 lojtarë që nuk aktivizohen? A nuk e meritojnë ata të luajnë? Duhet të shohësh seancat stërvitore dhe detajet e vogla. Lojtarët nuk duhet të më bindin mua, ata duhet të bindin vetveten se meritojnë të luajnë.”