Trajneri i Manchester City, Pep Guardiola, ka thënë se mesfushori anglez Kalvin Phillips ishte mbipeshë në seancën e parë stërvitore, pas rikthimit nga Kupa e Botës. Lojtari ishte një mungesë surprizë në sfidën e City përballë Liverpool në Carabao Cup, e cila u mbyll me fitoren 3-2 të “qytetarëve”.
I pyetur nga gazetarët për mungesën e Phillips, Guardiola sqaroi situatën e pazakontë:
“Ai (Phillips) nuk është i dëmtuar. Ai u rikthye mbipeshë. Nuk e di përse… Phillips nuk u rikthye në kushtet e duhura fizike për seancat stërvitore dhe për të luajtur.”
Mesfushori i talentuar i City iu bashkua klubit në merkaton e kaluar verore për shifrën e 45 milionë paundëve. Megjithatë, lojtari është aktivizuar vetëm 1 herë këtë sezon në Premier League. Ndërkohë në botëror, Phillips luajti në dy paraqitje me kombëtaren angleze, përballë Uellsit dhe Senegalit. Në të dyja rastet Kalvin zbriti në fushë si zëvëndësues.
Guardiola gjithashtu u pyet nga gazetarët se çfarë i komunikoi Phillips në lidhje me situatën, por tekniku spanjoll refuzoi të përgjigjej duke thënë se ishte një bisedë private. Pavarësisht një periudhe të parë sezoni disi zhgënjyese, Pep duket se nuk e ka humbur entuziasmin e tij për mesfushorin anglez. Trajneri u shpreh se kur Phillips të jetë përsëri në formën e tij më të mirë do të rikthehet në formacion:
“Kur të jetë gati ai do të luajë. Na nevojitet. Ai na nevojitet shumë…”
Kalvin Phillips është aktivizuar gjithsej 4 herë me “qytetarët” që prej transferimit të tij në Etihad. Në të gjitha këto paraqitje, mesfushori ka zbritur në fushë si zëvëndësues. Ndeshja e fundit e Phillips ishte ajo ndaj Chelsea në Carabao Cup nëntorin që lamë pas. E ardhmja e lojtarit tek Manchester City mbetet e paqartë, dhe javët në vijim do të jenë mjaft të rëndësishme për fatin e tij në Etihad.