Trajneri i Manchester City, Pep Guardiola, ditën e shtunë bëri një deklaratë që duket se ka shkaktuar mjaft zhurmë në opinionin publik. Spanjolli kërkoi pjesëmarrje më të lartë të fansave të klubit, gjatë ndeshjeve në shtëpi. Kjo gjë nuk u prit mirë nga tifozët, të cilët shprehën pakënaqësinë e tyre ndaj komenteve. Pavarësisht kësaj, Pep ka deklaruar se nuk ka ndërmend t’i kërkojë falje askujt. Numri 1 i pankinës së City u shpreh se komentet e tij ishin keqkuptuar:
“A thashë unë se isha i zhgënjyer për faktin se stadiumi nuk ishte i mbushur? Një interpretim mbetet një interpretim. Nuk do të kërkoj falje. E di se sa i vështirë ishte sezoni i kaluar, dhe kësaj rradhe duhet të bëjmë një përpjekje së bashku. Nuk ka rëndësi sa tifozë vijnë në stadium, ata më kënaqin gjithmonë. Pas 5 sezonesh këtu ata më keqkuptuan. Nuk do të kërkoj falje.”
Ndërkohë, përfaqësues zyrtarë të një nga grupimeve më të mëdha të tifozëve të Manchester City, u shprehën se komentet e Guardiolës ishin zhgënjyese. Kevin Parker, sekretar i përgjithshëm i grupimit zyrtar të tifozerisë së City tha:
“Nuk është e vërtetë, pjesëmarrja jonë është ekselente. Ai (Guardiola) nuk e kupton vështirësinë që disa njerëz kanë për të qenë në stadium në një ndeshje në orën 8 të mbrëmjes.”
Gjithsesi, trajneri spanjoll mbrojti argumentin e tij, duke thënë se nuk është aspak kritikues ndaj tifozerisë së klubit:
“Jam pafundësisht mirënjohës për suportin që kishim në ndeshjen me Leipzig. Gjithmonë e them se nëse fansat vendosin të vijnë jam mirënjohës pasi e di sa e vështirë është një ndeshje, dhe e kuptoj se na duhen tifozët tanë. Asnjëherë nuk mendoj se përse njerëzit nuk duan të vijnë. Në qoftë se nuk ke mundësi, atëhere mos eja. Në qoftë se fansat kanë një problem, do të tërhiqem unë… Qëllimet e mia janë të jem pjesë e një gjëje më të madhe dhe t’ia dalim së bashku.”