Presidenti i La Liga, Javier Tebas, ka thënë se mundësia që Kylian Mbappe t’i bashkohet Real Madrid sezonin e ardhshëm është e lartë. E ardhmja e superstarit francez ka qënë vazhdimisht objekt i spekullimeve, dhe këto vetëm sa janë shtuar, tashmë që kontrata e Mbappe është afër skadimit në fund të sezonit. Pavarësisht se destinacioni i rradhës i francezit nuk është ende i qartë, duket se zgjedhja ka qënë gjithmonë mes Real Madrid dhe PSG.
Tebas ndërkohë, në një intervistë të fundit është shprehur mjaft optimist për një transferim të mundshëm të Mbappe tek Real Madrid. Presidenti i La Liga u shpreh:
“Mendoj se mundësia është e lartë. Ky është një opinion personal. Po flasim për një lojtar 26 vjecar… Do të varet nga Real Madrid, presidenti dhe nga ajo që do të jenë të gatshëm të ofrojnë. Ardhja e Bellingham i ka dhuruar tashmë Real një yll, Vinicius është një tjetër. Nëse ai (Mbappe) dëshiron të shkojë tek Madrid atëherë do thoja se ka më shumë se 50% mundësi të ndodhë.”
Tebas ka lobuar dhe në të kaluarën që Kylian Mbappe t’i bashkohet Real Madrid. Presidenti i La Liga ka shkuar dhe më tej me deklaratat e tij, duke e cilësuar Ligue 1 si një kampionat jo kompetitiv. Ky cilësim erdhi pas vendimit të Mbappe për të qëndruar tek PSG në vitin 2022, edhe pse ishte më afër se kurrë një transferimi në Madrid.
Ndërkohë vet sulmuesi në intervistën e tij të fundit ka pranuar se ende nuk ka vendosur mbi të ardhmen. Mbappe ka thënë se për momentin është i përqëndruar tek PSG. Parizienët kanë ende shumë për të luftuar këtë sezon në Ligue 1, por sigurisht dhe në Champions League.
