Ish-futbollisti i Manchester United, Rio Ferdinand, ka thënë se është dëshpërues fakti që racizmi është ende një problem i madh në futboll. Ferdinand komentoi mbi incidentin e fundit që përfshiu brazilianin Richarlison, të cilit iu hodh një banana në fitoren 5-1 të Brazilit ndaj Tunizisë. Kjo ndodhi kur sulmuesi i Tottenham po festonte një gol.
Rio Ferdinand u shpreh se autoritetet duhet të bëjnë më shumë për të luftuar racizmin në sport. Ai u shpreh:
“Nuk po them se futbolli mund të ndryshojë ose të jetë kura ndaj racizmit sepse do të isha një idiot po të mendoja këtë. Por kur fëmijët e tu zgjohen në mëngjes dhe thonë: ‘Hej babi, a e pe bananen që i hodhën Richarlison?’, kjo është një çmenduri.”
Vet lojtari i Tottenham reagoi pas incidentit, duke thënë se racizmi do të vazhdojë çdo ditë dhe kudo, deri në momentin që autoritetet ndëshkojnë autorët. Ferdinand ndërkohë shtoi:
“Futbolli mund të luajë një rol të mirë në nënvizimin e problemeve dhe në unifikimin e autoriteteve dhe fuqive, për të vendosur rregullin dhe për të mbrojtur njerëzit.”
FIFA gjithashtu reagoi pas incidentit, duke rikujtuar tifozët se ka toleranca e organit ndaj racizmit është zero. Por Ferdinand beson se kjo nuk është e mjaftueshme. Ish-lojtari i United rikujtoi një tjetër rast të ngjashëm, me brazilianin Vinicius, i cili mori shumë fyerje raciste nga fansat e Atletico Madrid, në derbin me Real. Asokohe La Liga dënoi publikisht rastin, por nuk mori hapa të mëtejshëm.
Ferdinand tha:
“Unë nuk shoh që federatat të dalin dhe të mbështesin këta lojtarë me të gjithë forcën e tyre, si dhe të rreshtohen fort kundër racizmit, ose të thirret një konferencë e madhe shtypi dhe të thuhet ‘ne nuk e tolerojmë më këtë gjë’.”
Kapiteni i kombëtares braziliane, Thiago Silva, gjithashtu u shpreh se përgjigja ndaj këtyre ngjarjeve duhet të ndryshojë.