Cristiano Ronaldo ndihej tejet nervoz, përpara debutimit të tij me Manchester United përballë Newcastle, ku arriti të shënonte 2 gola. Në një ndeshje historike të Premier League, portugezi veshi përsëri, për herë të parë pas 12 vitesh, fanellën e United. Emri i 36 vjeçarit po këndohej dhe brohoritej gjatë gjithë ndeshjes, por për sulmuesin nuk ishte ekzaktësisht një moment i lehtë. Pas fitores 4-1 të “Djajëve të Kuq” ai u shpreh për mediat:
“Nuk e prisja të shënoja 2 gola. Prisja 1 por jo 2, ishte një moment i pabesueshëm. Kur filloi loja isha mjaft nervoz. Nuk e prisja që do të thërisnin emrin tim gjatë gjithë takimit. Po mendoja gjatë gjithë natës se duhej të luaja mirë dhe të tregoja se jam i aftë të ndihmoj skuadrën. Klubi është i jashtëzakonshëm dhe jam shumë krenar. Do të jap gjithçka që të krenohen me mua.”
Edhe pas përfundimit të takimit, fansat e United nuk u larguan nga shkallët e Old Trafford, duke vazhduar festimet në një atmosferë të jashtëzakonshme. Kjo gjë sigurisht u vu re dhe nga CR7 i cili komentoi:
“Të gjithë e dinë se futbolli në Anlgi është ndryshe nga kudo tjetër në botë. Për të qënë i sinqertë është vendi më special. Erdha këtu kur isha 18 vjeç dhe dhe më trajtuan në mënyrë të pabesueshme, prandaj jam këtu përsëri.”
Legjenda e United, ish trajneri Sir Alex Ferguson gjithashtu u shpreh i lumtur për debutimin fantastic të portugezit. Ai u shpreh për BBC Sport:
“Jam shumë i lumtur për Cristianon. Jam i lumtur për skuadrën dhe tifozët. Mund të dallosh atmosferën që ka pushtuar klubin që prej lajmit për afrimin e tij. Duket si një nga ditët e vjetra, është speciale. Të gjithë (tifozët) po ëndërrojnë. Ata mund të ëndërrojnë dhe ne do të fokusohemi.”
