Mohamed Salah ka bërë të ditur një dëshirë të tijën, që sipas të gjitha gjasave, i ka bërë mjaft të lumtur të gjithë tifozat e Liverpool. Egjiptiani ka thënë se dëshiron që të mbyllë karrierën e tij në Anfield, dhe ndihet i plotësuar si futbollist në ekipin e Jurgen Klopp.
Kontrata e 29 vjeçarit me “The Reds” mbaron në fund të sezonit të ardhshëm, por Salah duket se i ka hapur që tani dyert për një rinovim të mundshëm. Duke marrë parasysh formën fantastike që po kalon, si dhe talentin e sulmuesit, dëshira e drejtuesëve të klubit me shumë mundësi është e njejtë. Në një intervistë të fundit për Sky Sports, Mohamed Salah tha:
“Kjo gjë nuk varet nga unë, por nëse më pyet mua, do të doja shumë të qëndroja deri në ditën e fundit të karrierës time si futbollist. Por nuk është në dorën time. Varet dhe se çfarë kërkon klubi.”
Ai shtoi:
“Në momentet që flasim nuk mund ta përfytyroj dot veten time të luaj kundër Liverpool. Është e vështirë, nuk dua të flas për këtë gjë. E di se do të ndihesha shumë i mërzitur.”
Salah startoi karrierën e tij si futbollist me Al Mokawloon, në vendlindjen e tij, Egjipt. Aventura e tij europiane startoi me Basel në Zvicër. Ky ishte dhe momenti që talenti i tij mori vëmendjen e klubeve “big” në Europë. Lojtari u aktivizua më pas me Chelsea, Fiorentinën dhe Romën, duke shfaqur një nivel të lartë dhe konsistent loje.
Por ishte Liverpool ekipi ku egjiptiani gjeti më mirë veten dhe formoi profilin e tij karakteristik si futbollist, si dhe fitoi trofetë prestigjozë të Champions League dhe Premier League. Kjo sigurisht ishte dhe merita e Jurgen Klopp, që arriti të nxjerrë më të mirën nga Salah në fushën e blertë.
