Ndeshja hapëse e Euro 2020 do të jetë pikërisht ajo mes Italisë dhe Turqisë, në kryeqytetin italian Romë. Tashmë që na ndan shumë pak nga starti i kompeticionit, në media kanë filluar dhe deklaratat, komentet dhe analizat e para mbi sfidat që na presin.
Senol Gunes, trajneri i përfaqësueses turke të futbollit, ka dhënë komentet e tij për përballjen hapëse të Europianit, si dhe rrugëtimin e Turqisë në Euro. Në një intervistë për Anadolu Agency, 68 vjeçari u shpreh se dëshira e tij është që Turqia ta nisë kompeticionin në mënyrë sa më bindëse. Kjo pavarësisht se Gunes e cilësoi ndeshjen e parë si më të vështirën për ekipin e tij.
Trajneri veteran u shpreh:
“Të treja ndeshjet e grupit janë të vështira për ne, por më e vështira është e para.
Mes 3 skuadrave që do të përballemi e shoh Italinë në një nivel më të lartë. Një rezultat i mirë, pra një fitore ose barazim do të na jepte një avantazh, por humbja nuk do të ishte fundi i botës.”
Senol Gunes gjithashtu shtoi:
“Edhe nëse arrijmë të mundim Italinë nuk e kemi të garantuar kualifikimin. Ndeshjet pasardhëse me Uellsin dhe Zvicrën janë gjithashtu të rëndësishme. Qëllimi ynë është të kualifikohemi në fazën e ardhshme, të luajmë futboll të bukur, dhe të mos heqim dorë asnjëherë nga parimet e një loje të ndershme.”
Trajneri turk gjithashtu vuri në dukje faktin, se kundërshtarët e tyre në grupin A, gjenden të gjithë më lart se Turqia në renditjen e përgjithshme të kombëtareve nga FIFA. Gjithsesi, kjo nuk ka shumë rëndësi sipas Sonel. Numri 1 i pankinës turke u shpreh se ekipi i tij mund të garojë pa problem përballë çdo ekipi. Mbetet të shohim se deri ku do të shkojë rrugëtimi i turqëve në Euro 2020.
