Kapiteni i Danimarkës, Simon Kjaer, ka thënë se skuadra e tij nuk është e kënaqur dhe nuk do të mjaftohet me mbërritjen deri në gjysmëfinalet e Euro 2020. Danezi ka thënë se objektivi është vazhdimi i rrugëtimit të ëndrrave duke eleminuar Anglinë ditën e enjte.
Që prej humbjes përballë Belgjikës, Danimarka ia ka dalë të fitojë të gjitha ndeshjet e tjera, duke fituar zemrat e shumë tifozëve në mbarë botën. Pas fitores ndaj Republikës Çeke, kapiteni Kjaer deklaroi për mediat:
“Është një çmenduri. Një arritje vërtet shumë e madhe që kemi bërë me skuadrën, por gjithashtu me stafin dhe njerëzit rreth nesh. Kishim një qëllim dhe ai ishte të shkonim në Wembley. Por, do të gënjeja nëse do të thoja se jemi të kënaqur me gjysmëfinalen.”
Gjithsesi, danezët janë të ndërgjegjshëm për ekipin që kanë përballë. Anglia e Gareth Southgate është ende e pamposhtur në kompeticion, si dhe nuk ka pësuar asnjë gol të vetëm. Vet trajneri i Danimarkës, Kasper Hjulmand, beson se Anglia është e destinuar të fitojë një trofe madhor së shpejti. Ai u shpreh duke buzëqeshur:
“E kam thënë shpesh herë se besoj tek Anglia, por nuk mendoj se do të jetë ky viti i tyre! Mendoj se Gareth Southgate ka punuar në mënyrë fantastike me skuadrën për shumë vite. Janë një ekip i vështirë për t’u mundur, për këtë nuk ka dyshim. Por, ne i kemi parë dhe kemi disa ide se si mund t’ia dalim.”
Anglia gjithashtu do të ketë avantazhin e shumicës së fansave në Wembley, i cili për këtë takim do të akomodojë plot 60,000 tifozë. Megjithëse fansat danezë nuk mund të udhëtojnë drejt Anglisë për shkak të kufizimeve anti-covid, UEFA ka dhënë ndihmën e saj. Ajo i ka dhënë në dispozicion 5000 bileta federatës daneze të futbollit, e cila do t’i shpërndajë për fansat danezë të cilët jetojnë në Mbretërinë e Bashkuar.