Vendimi i Solskjaer, për të nisur takimin përballë Everton, pa Cristiano Ronaldon si titullar, habiti shumë analistë sportivë dhe fansa të United. Dhe mesa duket, kjo zgjedhje ka qenë jo e duhura, dhe për ish-trajnerin legjendar të “Djajëve të Kuq”, Sir Alex Ferguson.
Gjatë një bisede me ish kampionin e UFC, Khabib Nurmagomedov në Old Trafford, kamerat kapën një moment mjaft interesant. Sir Alex u dëgjua teksa tha: “Gjithmonë duhet ta nisësh takimin me lojtarët e tu më të mirë.” Komenti erdhi pas barazimit 1-1 që United regjistroi kundër Everton, takim në të cilin Ronaldo u fut në fushë, vetëm në minutën e 57’. Sipas Ferguson, kundërshtarët morën një shtysë ekstra në momentin që panë se Ronaldo nuk ishte në fushë.
Pak a shumë, i të njejtit mendim ishte dhe ish-sulmuesi i kombëtares angleze dhe Arsenal, Ian Wright. Ai komentoi për Match of the Day:
“Kur ke Cristiano Ronaldon në skuadër duhet të ndërtosh një ekip dhe strukturë rreth tij, në mënyrë që të funksionojë për të. Nëse ke në skuadër një person që fiton ndeshje, dhe nuk mund t’i shërbesh si duhet, që ai të bëjë atë që di të bëjë, normalisht që do të largohet në atë mënyrë nga fusha.”
Pavarësisht zhurmës së krijuar, Solskjaer e ka mbrojtur dhe një herë tjetër vendimin e tij:
“Unë dhe ai (Ronaldo) kuptojmë më mirë se ekspertët. Duhen zgjedhur momentet e duhura se kur duhet të luajë dhe kur nuk duhet të aktivizohet. Ai nuk është më një lojtar i ri, por është më profesionist se kurrë dhe gati për të nisur çdo takim me energji të reja.”
Ndërkohë, lajm pozitiv për trajnerin e United, është se ndihmësi i tij, Mike Phelan, ka rinovuar me klubin deri në vitin 2024.
