Manchester United nuk shkoi më shumë se barazimi 1-1 përballë Everton, në ndeshjen e vlefshme për Premier League. Rezultati ishte zhgënjyes për “Djajtë e Kuq” të cilët nisën sezonin me pritshmëri të larta, por kanë arritur deri tani, vetëm 2 fitore në 6 ndeshje.
Gjithsesi, kritikat kanë qenë më të ashpra kësaj rradhe drejt trajnerit Solskjaer. Arsyeja ishte mos aktivizimi i Cristiano Ronaldos që në fillim të takimit. Hera e fundit që portugezi e nisi ndeshjen nga stoli për United ishte në vitin 2007.
Trajneri norvegjez e justifikoi vendimin me faktin se ekipi kishte nevojë për një rifreskim, pas fitores në minutat shtesë përballë Villarreal në Champions League. Zgjedhja e Solskjaer u duk e duhura në momentin që Martial i dhuroi avantazhin në fushë United, pak përpara fundit të pjesës së parë. Më pas, pa u mbushur një orë lojë trajneri hodhi në lojë Ronaldon. Pavarësisht kësaj, Everton gjeti golin e barazimit me Andros Townsend, dhe rezultati nuk ndryshoi deri në fund të takimit.
CR7 ishte dukshëm i frustruar pasi mbaroi ndeshja, teksa u fut nxitimthi tek tuneli, drejt dhomave të zhveshjes. Ndërkohë Solskjaer argumentoi në këtë mënyrë mendimin e tij:
“Nuk jam i penduar. Vendimet merren duke patur parasysh se kemi përpara një sezon të gjatë. Duhet menaxhuar në mënyrë të saktë ngarkesa e çdo lojtari, dhe prandaj vendimi i marrë ishte korrekt. Anthony Martial luajti mirë, shënoi dhe një gol. Edinson Cavani gjithashtu kishte nevojë për minuta, dhe ai mund të kishte shënuar. Këto janë vendime që duhet t’i ndërmarrim.”
Ndërkohë pas pushimit të ndeshjeve ndërkombëtare, United do të ketë një sërë sfidash të vështira në kampionat. Të besuarit e Solskjaer do të përballen me Leicester, Liverpool, Tottenham dhe Manchester City. Ndërkohë kyç është dhe përballja me Atalantën në Champions League.
