Anglia ka vënë dhe një herë në dyshim statusin e saj si favorite në Kupën e Botës, teksa “3 Luanët” u mposhtën 1-0 nga Italia në Nations League. Përtej rezultatit, ishte paraqitja e të besuarëve të Southgate, ajo që ishte më zhgënjyese. Anglezët nuk kanë shënuar një gol nga loja e hapur prej 495 minutash, dhe ekipit i mungonte kimia dhe komunikimi i duhur mes lojtarëve.
Pavarësisht kësaj, trajneri Southgate ishte i mendimit se ekipi luajti mirë për pjesën më të madhe të ndeshjes, por u shpreh se e kupton mjaft mirë reagimin e fansave. Tekniku deklaroi:
“Mendoj se për pjesën më të madhe të lojës luajtëm mjaft mirë. Nuk ia dolëm të evitonim momentin deçiziv të takimit, dhe kishim momente që dhe ne mund të ishim treguar më të saktë përpara portës së tyre, por kualiteti jonë nuk ishte i duhuri. Sigurisht që në fund janë rezultatet ato që të gjithë do të shohin, por mendoj se kishte shumë gjëra pozitive për ne si skuadër në këtë sfidë.”
Southgate shtoi:
“Mendoj se kishte shumë performanca individuale të mira, dhe personalisht mendoj se performanca jonë është një hap në rrugën e duhur, por e kuptoj se për shkak të rezultatit, ky nuk do të jetë reagimi i jashtëm. Është e vështirë të përcaktosh arsyen se përse nuk shënuam gol, pasi ishim në zonën e duhur, por thjesht na mungoi ajo copëz kualiteti kësaj rradhe.”
Ndërkohë paralelisht me ndeshjen e Anglisë, Hungaria ia doli të sigurojë një tjetër fitore mbresëlënëse, kësaj rradhe ndaj Gjermanisë në transfertë. Hungarezët fituan 1-0 në Leipzig, dhe ky fakt mund të jetë disi ngushëllues dhe për Anglinë, e cila gjithashtu u mposht nga Hungaria. “3 Luanët” do të luajnë përballë Gjermanisë në takimin e rradhës, i cili do të jetë dhe i fundit përpara startit të Kupës së Botës.
