Trajneri i Barcelonës, Xavi Hernandez, ka deklaruar se është në kontakt të vazhdueshëm me Leo Messin, dhe superstari argjentinas e ka gjithmonë të hapur derën tek Barcelona. Që prej largimit të Messi nga katalanasit në vitin 2021, zërat për një rikthim të mundshëm të tij në Camp Nou kanë qënë gjithmonë aktive. Së fundmi, babai dhe njëkohësisht agjenti i argjentinasit, Jorge Messi, është takuar përsëri me presidentin e Barcelonës, për të diskutuar mbi të ardhmen e superstarit, që tashmë aktivizohet me PSG.
Mbi zhvillimet e fundit ka komentuar dhe trajneri Xavi, i cili është shprehur mjaft pozitivisht mbi rikthimin e mundshëm të “pleshtit” në Camp Nou. Tekniku spanjoll tha:
“E kam thënë dhe më parë se kjo është shtëpia e tij dhe dyert janë të hapura, ai është miku im dhe mbajmë vazhdimisht kontakte. Do të varet e gjitha prej tij, se çfarë dëshiron për të ardhmen. Kjo është shtëpia e tij, nuk ka dyshim. Futbollisti më i mirë në histori sigurisht që do të përshtatet gjithmonë në ekip.”
Presidenti i Barcelonës, Joan Laporta, nuk e ka fshehur ndonjëherë dëshirën për të rikthyer Messin në Camp Nou, por gjithashtu, është treguar i kujdesshëm, duke pranuar vështirësitë e këtij operacioni.
Në rast se argjentinasi do të luajë përsëri për Barcelonën në të ardhmen, lind natyrshëm pyetja se si do të transformohet modeli i lojës që Xavi ka ngritur aktualisht tek ekipi. Kjo temë diskutimi ka ndarë dhe fansat e klubit në dy grupime, disa prej tyre mendojnë se Messi ka ende shumë për t’i dhënë Barcelonës, ndërkohë që të tjerë janë të mendimit se rikthimi i numrit 10 mund të pengojë transformimin e Barcelonës dhe daljen në skenë të talenteve të reja. Megjithatë, kjo mbetet për t’u parë pasi momentalisht, drejtuesit e klubit spanjoll nuk kanë ende një strategji konkrete për të sjellë Messin përsëri në Spanjë.