Trajneri i Anglisë, Gareth Southgate beson se mentaliteti është pika kyç që do të bëjë diferencën në sfidën direkte ndaj Ukrainës. Numri 1 i pankinës së “3 Luanëve” u kujdes që të ulte entuziazmin, pas fitores së pastër dhe mjaft domethënëse ndaj Gjermanisë. Southgate u shpreh se përgatitjet për ndeshjen e ditës së shtunë kanë rezultuar më të vështira. Sipas tij, arsyeja është se lojtarët nuk e njohin mirë kundërshtarin. Gjithashtu, anglezët do të luajnë për herë të parë jashtë Wembley-t këtë Europian.
Gareth dukej se ishte i ndërgjegjshëm për perceptimin e shumë fansave anglezë, të cilët pas eleminimit të Gjermanisë, besojnë se sfida më e vështirë në rrugën drejt finales tashmë ka kaluar. Anglezi deklaroi për Official England Podcast:
“Kjo do të jetë një sfidë fantastike për ne. Do të na duhet të largohemi nga Wembley, drejt një vendi me klimë më të nxehtë dhe shumë pak fansa anglezë në stadium.
Lojtarët njihnin mjaft mirë individualisht kundërshtarët gjermanë, ndërsa kësaj rradhe duhet të mësojmë shumë më shpejt. Ekziston perceptimi se thjesht duhet të luajmë dhe gjithçka e kemi të siguruar, por duhet të jemi shumë të fokusuar ditën e shtunë.”
Trajneri u shpreh se përgatitja e lojës nga ana taktike në mënyrën e duhur është mjaft e rëndësishme në këtë sfidë.
Ukraina u kualifikua me vështirësi ndaj Suedisë, por ekipi i Andriy Shecvchenko ka dëshmuar disa herë gjatë Euro 2020 se mund të kthehet në një skuadër mjaft frustruese për kundërshtarin. Artem Dovbyk ishte heroi që i siguroi kualifikimin ukrainasve, me një gol në minutën e fundit shtesë të takimit. Kësaj rradhe, Dovbyk me shokë janë akoma më të motivuar për të luftuar, duke qenë se përballë kanë Anglinë.
Sfida do të luhet në stadiumin Olimpico të Romës.
