Ish-mbrojtësi i Manchester United, Gary Neville, ka thënë se Trent Alexander-Arnold mund të jetë një nga mbrojtësit më të mirë të të gjitha kohërave, nëse punon për të përmirësuar afëtësitë e tij difensive. 23 vjeçari është vënë në qendër të kritikave së fundmi, për gabimet e tij në mbrojtje, të cilat kanë ndikuar dhe në ecurinë e lëkundur të Liverpool në kampionat dhe Champions League. Por Neville, edhe pse tifoz i palëkundur i United, ka shprehur admirimin e tij për Trent.
Gary u shpreh për Sky Sports:
“Asnjë mbrojtës që unë kam parë në këtë vend nuk mund të bëjë atë që ai (Trent) bën. Pra, në qoftë se ai punon për disa gjëra bazike përsa i përket mbrojtjes, dhe fiton pak konsistencë, atëherë nuk do të kemi thjesht një nga mbrojtësit e djathtë ofensivë më të mirë që ky vend ka prodhuar, por mbase do të kemi mbrojtësin e djathtë më të mirë në botë. Kemi të bëjmë me një mbrojtës të nivelit të Cafu, është diçka vërtet speciale.”
Neville u shpreh se ka një disbalancë në lojën e Trent, duke qënë se sipas tij, elementi ofensiv tek lojtari lë në hije lojën e tij në mbrojtje. Gjithsesi, ish-lojtari i United u tregua i qartë, duke vënë dhe një herë në dukje kritikat e tij për talentin e Liverpool:
“Mendoj se Trent duhet të punojë për aftësitë e tij në mbrojtje. E kam thënë para disa viteve se loja e tij në mbrojtje ka një mungesë serioziteti dhe mprehtësie. Në një farë pike në karrierën e tij, kjo gjë do ta lërë prapa.”
Në këtë situatë, ekziston një rrezik real që mbrojtësi i Liverpool të mos përfshihet në kombëtaren angleze për Kupën e Botës. Por Neville mendon se kjo mund të reuzltojë në një mundësi të mirë për Trent, që t’u provojë të kundërtën kritikëve të tij, dhe të përmirësohet akoma më tej.