Sipas raportimeve më të fundit, Newcastle United është duke bërë gati një ofertë mjaft tunduese, për të marrë shërbimet e trajnerit të Ajax, Erik ten Hag. Emri i këtij të fundit është linkuar me klubin anglez së fundmi në mediat hollandeze. Në të njejtën kohë, përflitet se drejtori sportiv i Ajax, Marc Overmars, është po ashtu nën shënjestrën e Newcastle.
Ndërkohë burime pranë Ajax, bëjnë me dije se Overmars nuk është i vetmi kandidat për postin e drejtorit sportiv të klubit hollandez. Ish-futbollisti irlandez, Joe Kinnear, është një tjetër alternativë që drejtuesit e rinj të Newcastle kanë në mendje.
Ten Hag po kalon një moment të mirë në krye të Ajax, teksa ekipi i tij zhvilloi një super ndeshje në Champions League përballë Borussia Dortmund. Gjigandët hollandezë fituan me rezultatin e thellë 4-0, duke dëshmuar dhe një herë forcën e tyre si grup, pavarësisht largimeve të rëndësishme në 2 sezonet e kaluara.
Emri i teknikut të Ajax është përfolur dhe më parë për një kalim të mundshëm në Premier League, specifikisht tek Tottenham Hotspur. Por Ten Hag është shprehur disa herë se ndihet mjaft i lumtur në Hollandë. Kur u pyet se çfarë mund ta shtynte atë të largohej, ai u përgjigj:
“Nuk ka arsye për mua që ta mendoj këtë gjë tani. Jam shumë i lumtur tek Ajax dhe jap gjithçka për këtë klub, çdo ditë. E di se nuk mund të planifikosh gjithçka në futboll, por do të duhej të kisha një ofertë të jashtëzakonshme për të ndryshuar planet e mia.”
Pronarët e rinj të Newcastle kanë në duart e tyre një potencial financiar të jashtëzakonshëm. Por kjo mund të mos jetë mjaftueshëm për t’i mbushur mendjen trajnerit Ten Hag. Në fund të ditës, klubi anglez ka opsione të tjera në tavolinë, si: Lucien Favre, Roberto Martinez dhe Eddie Howe. Kështu që sipas të gjitha gjasave, në rastin e një oferte, gjithçka do të jetë në dorën e vet Erik ten Hag.
