Me Europianin që ndodhet tashmë vetëm 1 javë larg, ekipet janë gati dhe përgatitjet drejt fundit. Kompeticioni do të ngrejë siparin në datë 11 qershor, me sfidën Turqi – Itali. Kombëtaret bëjnë pjesë në grupin A, së bashku me Zvicrën dhe Uellsin, 2 ekipe po ashtu mjaft të forta dhe kompetitive. Megjithatë, vetëm 2 nga përfaqësueset do të kalojnë grupin, dhe secila do të luajë shanset e veta për të arritur objektivat.
Padyshim, ekipi më i fortë në grup mbetet Italia. Pas zhgënjimit të madh të vitit 2018, ku italianët nuk arritën të ishin pjesë e Kupës së Botës, duket se gjërat kanë ndryshuar. Trajneri Roberto Mancini beson se ekipi i tij nuk është larg të qënit më të mirët e Europës, dhe ka statistika që e provojnë këtë gjë. Italia u kualifikua në Euro 2020 duke fituar të gjitha ndeshjet kualifikuese, si dhe doli e para e grupit në Nations League. Këto rezultate janë sinjale të forta për këdo që nënvlerëson shancet e “azurëve” në Europian.
Turqia është një tjetër ekip mjaft interesant dhe me potencial për të surprizuar në Euro 2020. Turqit mbyllën kualifikueset në vendin e dytë në grup, vetëm 2 pikë prapa Francës, kampiones së botës në fuqi. Gjithashtu, gjatë këtij viti kombëtarja e drejtuar nga Senol Gunes ka regjistruar fitore bindëse përballë Hollandës dhe Norvegjisë. Duket se organika e brendshme e përfaqësueses turke mund t’i hapë punë çdo ekipi në grupin A. Por, pavarësisht kësaj, kualifikimi për në fazën tjetër mbetet një objektiv madhor për Turqinë.
Zvicra dhe Uellsi janë dhe 2 skuadrat e tjera që kompletojnë grupin A. Secila prej tyre ka në përbërje talente që aktivizohen në ligat kryesore europiane të futbollit. Ylli kryesor i uellsianëve është Gareth Bale, ndërsa ai i zvicerianëve është Yann Sommer.
Modeli i lojës së ekipeve përqëndrohet në përgjithësi tek talentet individuale, por kualifikimi për në fazën e ardhshme kërkon shumë më shumë kompaktësi dhe koordinim në grup. Në këtë pikë, duket se Turqia e Senol Gunes mund të ketë avantazhin përballë Zvicrës dhe Uellsit. Gjithsesi grupi A mbetet i komplikuar, dhe përveç faktit se Italia do të sigurojë me shumë mundësi kualifikimin, asgjë tjetër nuk mund të thuhet me siguri.
