Trajneri i Watford, Claudio Ranieri, beson se mund të vendosë rekordin, për trajnerin më të vjetër që ka drejtuar një ekip në Premier League. Italiani do të drejtojë për herë të parë klubin anglez ditën e shtunë në takimin përballë Liverpool. Ndërkohë 4 ditë më vonë, Ranieri do të festojë ditëlindjen e tij të 70.
Rekordi për trajnerin me moshë më të madhe, që ka drejtuar një klub në Premier League, mbahet momentalisht nga Roy Hodgson. Ky i fundit hoqi dorë nga drejtimi i Crystal Palace në maj, vetëm 2 muaj përpara se të mbushte 74 vjeç.
Kur u pyet nëse mund të vazhdonte punën e tij, po aq gjatë saç bëri Hodgson, italiani u përgjigj:
“Përse jo? Jam ende i ri. Nuk e ndiej moshën. Futbolli është jeta ime. Nëse ndihem mirë, nëse ndiej akoma emocione, nëse ndiej se kam ende energji për t’i dhënë lojtarëve të mi, dua të vazhdoj.”
Trajnerë të tjerë që i kanë dedikuar të gjithë jetën e tyre futbollit janë dhe Sir Alex Ferguson, Neil Warnock dhe Sir Bobby Robson.
Ndërkohë, edhe pse italiani e njeh mirë familjen Pozzo, e cila zotëron Watfordin, ai gjithashtu e di se ata janë të pamëshirshëm kur bëhet fjalë për të hequr qafe menaxherët, të cilët nuk përmbushin standardet e klubit. Që kur pronarët e rinj të Watford morën drejtimin e klubit në vitin 2012, bordi drejtues ka ndëruar plot 14 trajnerë,
Por Ranieri është i ndërgjegjshëm për këtë gjë, duke thënë se në futbollin italian, kjo është normale:
“Në Itali kjo është normale. Vetëm në Angli ishte e pazakontë. Por edhe këtu, shumë klube kanë ndryshuar në këtë aspekt.”
Teknikut i është ofruar një kontratë 2 vjeçare për të provuar veten në krye të Watford. Kujtojmë se Ranieri fitoi titullin e Premier League me Leicester City në sezonin 2015-16.
