Federata gjermane e futbollit ka konfirmuar vetëm 1 ditë më parë, se Hansi Flick do të marrë drejtimin e skuadrës pas Euro 2020. Largimi i Joachim Low u bë zyrtar pak kohë më përpara, nëpërmjet një lajmërimi në profilin e kombëtares gjermane të futbollit në Twitter. Hansi Flick do të nënshkruajë një kontratë pothuajse 3 vjeçare me “Panzerat”, pra deri në vitin 2024, sigurisht me të drejtë rinovimi në rastin e përmbushjes së objektivave.
Trajneri i ri u bë mjaft i njohur në arenën europiane gjatë 2 sezoneve të fundit. Ishte pikërisht Flick ai që udhëhoqi Bayern Munich në rrugën drejt trofeve, duke fituar: Bundesligën 2 herë, DFB-Pokal, Champions League-ën, DFL-Supercup, UEFA Supercup, si dhe Kupën e Botës për klube. Gjermani u vendos nën drejtimin e bavarezëve duke pasuar Niko Kovac, pas një krize rezultatesh që kaploi Bayern në mes të sezonit.
Sigurisht, fansat e klubit u surprizuan me vendimin e Flick, i cili duhet thënë se erdhi në mënyrë disi të papritur. Numri 1 i pankinës së Bayern Munich u shpreh në një deklaratë për mediat:
“Sezoni sapo ka mbaruar, dhe gjithashtu dhe 2 vitet e mia te Bayern Munich.
Shpirti i skuadrës dhe sjellja e lojtarëve ishte fantastike. Mendoj se nga kjo eksperiencë do të marr shumë gjëra me vete, të cilat do të më ndihmojnë të formoj modelin e punës time si trajner. Po pres me padurim të startoj punë me kombëtaren gjermane, sepse mund të dalloj kualitetin e lartë të lojtarëve, sidomos të rinjëve.”
Oliver Bierhoff, drejtori i përgjithshëm i kombëtares gjermane të futbollit, u shpreh se Flick ishte i preferuari i tij që prej startit të garës. Pas konfirmimit të Jurgen Klopp, se ishte i lumtur te Liverpool, Hansi Flick mbeti e vetmja alternativë bindëse për stolin e “Die Mannschaft”. Eksperienca e tij si asistent i Joachim Low, në Kupën e Botës 2014 është një tjetër avantazh që ka ndikuar në përzgjedhjen e tij nga ana e federatës.