Shorteu i përballjeve direkte në Champions League ka rezervuar përballje pikante, teksa goglat kanë vënë përballë njëri-tjetrit kundërshtarë të vjetër. Liverpool do të përballet dhe një herë tjetër me Real Madrid, një përsëritje e finales së sezonit të kaluar, ku në fund triumfuan madrilenët. Të besuarit e trajnerit Carlo Ancelotti fituan 1-0 me gol të Vinicius Junior.
Ndërkohë përsa i përket përballjeve të tjera, kampionët në fuqi të Premier League do të përballen me RB Leipzig. Ekipi i Pep Guardiolës është padyshim favorit për të fituar përballjen, por gjermanët nuk janë një ekip për t’u nënvlerësuar. Një tjetër sfidë interesante do të jetë ajo mes Tottenham dhe AC Milan. Italianët kthehen kështu pas shumë vitesh, në fazën me eleminim të Champions League. Trajneri i Tottenham, Antonio Conte, i njeh mjaft mirë kuqezinjtë, duke marrë parasysh eksperiencën e tij në Serie A. Bayern Munich ndërkohë do të përballet me francezët e PSG, në një ndeshje mjaft të fortë që rezervon spektakël.
Italianët e Napoli do të përballen me gjermanët e Frankfurt. Napoletanët janë mposhtur vetëm 1 herë gjatë këtij sezoni në të gjitha kompeticionet, dhe humbja erdhi përballë Liverpool në ndeshjen e fundit të fazës në grupe. Duke parë formën e tyre fantastike në kampionat, italianët shihen si favoritë. Benfica ndërkohë do të vihet përballë Club Bruges. Sfida është mjaft interesante, dhe pavarësisht faktit se portugezët shihen si favoritë, blegët e Bruges janë në gjendje të prodhojnë surpriza.
Shorteu ka vënë përballë Chelsea me gjermanët e Borussia Dortmund. Të besuarit e trajnerit Potter shihen si ekipi favorit, por përballja do të jetë padyshim mjaft e luftuar.
Lista e plotë e përballjeve:
- RB Leipzig vs Manchester City
- Club Bruges vs Benfica
- Liverpool vs Real Madrid
- AC Milan vs Tottenham
- Frankfurt vs Napoli
- Borussia Dortmund vs Chelsea
- Inter Milan vs Porto
- Paris St-Germain vs Bayern Munich