Italia e Roberto Mancinit është kualifikuar për në çerekfinalet e Euro 2020 pas 120 minutash mjaft të lodhshme, përballë një kundërshtari modest në letër si Austria. Në Wembley Stadium, 90 minutat e rregullta u mbyllën pa gol. Mes të tjerash, në sy ra pamundësia e skuadrës italiane për të krijuar raste të pastra shënimi dhe aksione të rrjedhshme.
Ishte talenti i Juventus Federico Chiesa, i cili pas 95 minutash mjaft frustruese, i dha fund pritjes së italianëve për një gol. I pamarkuar dhe gati i harruar fare nga mbrojtja kundërshtare, Chiesa shfrytëzoi një pasim mjaft të mirë të Leonardo Spinazzola. Me tre prekje mjaft të bukura dhe me klas, sulmuesi stopi topin, duke e derguar më pas me kembën e tij të majtë në rrjetë. Duket se lojtari ka ndjekur hapat e babait të tij, Enrico Chiesa, i cili po ashtu gjeti rrugën e rrjetës para më shumë se 25 viteve me Italinë, në Europian.
Por, goli i qetësisë për të besuarit e Mancinit do të vinte vetëm në minutën e 115’. Ishte Matteo Pessina i cili përfundimisht i dha dhe stolit të Italisë një arsye për të festuar me të. Pavarësisht kësaj, Austria arriti të gjente golin me Sasa Kalajdzic, në një goditje këndi. Megjithëse rezultati nuk ndryshoi deri në fund të takimit, goli i Kalajdzic theu një rekord mjaft madhor të mbajtur nga “Azurët”. Deri më tani, përfaqësuesja italiane kishte plot 1,168 minuta pa pësuar gol.
Megjithëse entuziazmi është i lartë tek kampi italian, nuk mund të mos vihet në dukje vështirësia e lojtarëve për të finalizuar aksionet e tyre. E njejta gjë u pa dhe gjatë fazës në grupe, në fitoren përballë Turqisë, e cila erdhi pas shumë përpjekjesh të shkuara dëm në portën kundërshtare. Gjithsesi, fitorja përballë Austrisë ishte e 12-a rradhazi për “Azurët” dhe ky rekord mbetet mjaft domethënës. Pavarësisht mungesës së përballjeve me kundërshtarë “big”, mbrojtja solide dhe sulmi që në fund të ditës mbaron punë, mbeten një garanci e fortë në duart e italianëve për të triumfuar në Euro 2020.