Legjenda angleze John Terry ka dhënë dorëheqjen nga roli i tij si ndihmës trajner te Aston Villa, për t’u fokusuar tek objektivi i tij për t’u bërë trajner me kohë të plotë. Ish mbrojtësi i Chelsea dhe kombëtares angleze iu bashkua stafit të Dean Smith në tetor të vitit 2018. Eksperienca te Aston Villa mund të konsiderohet mjaft e suksesshme për Terry, i cili ndihmoi klubin të rikthehej në Premier League në vitin 2019. Por, duket se ka ardhur momenti që Terry të mbajë më shumë përgjegjësi në supet e tij. Ai u shpreh:
“Gjithmonë ka qenë ambicia ime që të përqëndrohem te një karrierë si menaxher. Nëse mundësia e duhur troket në derë, ndihem gati për të ndërmarrë një sfidë të tillë.”
40 vjeçari u shpreh se marrja e vendimit për t’u larguar ishte e vështirë dhe sqaroi planet për të ardhmen e afërt:
“Ishte një vendim ekstremisht i vështirë për mua. Dua të tregoj respekt maksimal për trajnerin e Aston Villa dhe këdo tjetër që është pjesë e klubit. Plani im momental është të shpenzoj pak kohë me familjen time, dhe më pas, shpresoj të marr disa ftesa për të vizituar klube dhe trajnerë në Europë. Në këtë mënyrë mund të zhvilloj dhe objektivin tim.”
Terry u përfol për një kohë të gjatë për një lëvizje të mundshme drejt Bournemouth apo Celtic, por tani, të dyja këto pozicione janë të zëna. Në lidhje me largimin e tij komentoi dhe trajneri i Aston Villa, Dean Smith:
“Jam i zhgënjyer që po humbas John si pjesë të stafit tonë, por e kuptoj plotësisht dhe e respektoj vendimin e tij. John ka luajtur një rol shumë të rëndësishëm në suksesin që klubi ka patur gjatë viteve të fundit. Nuk kam dyshime që ai do të jetë një trajner elitar dhe i uroj suksese në të ardhmen.”
