Cristiano Ronaldo ka biseduar me agjentin Jorge Mendes, në një mbledhje të paparashikuar më parë, në lidhje me të ardhmen e tij. Sipas raportimeve të “The Sun”, Mendes ka udhëtuar me një avion privat drejt Anglisë, për të sqaruar shqetësimet e yllit portugez, dhe mediat angleze bëjnë me dije se tashmë çdo opsion është në tavolinë.
Ronaldo ka shënuar 14 gola në të gjitha kompeticionet për United këtë sezon, por mësohet se portugezin e shqetëson shumë performanca e përgjithshme e “Djajëve të Kuq”. Ish-ylli i Real Madrid gjithashtu është i frustruar me taktikat e trajnerit gjerman Ralf Rangnick, teksa duket se nuk po ia del dot të japë 100% e tij, me stilin e ri të lojës.
Një burim pranë portugezit ka bërë me dije:
“Cristiano është shumë i shqetësuar nga ajo që po ndodh te United. Skuadra po merr shumë kriticizëm dhe ai e di se është një nga liderat. Ka shumë probleme, Cristiano po e ndien presionin dhe ndihet shumë i stresuar nga kjo situatë.”
Burimi shtoi:
“Ai (Ronaldo) kërkon dëshpërimisht që lëvizja e tij tek United të jetë një sukses. Por, Ronaldo po fillon të kuptojë se me këtë organizim, fitorja e trofeve do të jetë shumë e vështirë. Jorge erdhi që ta vizitonte, dhe kaluan kohë së bashku duke diskutuar sesi po shkojnë gjërat, cilat janë problemet dhe si mund të zgjidhen. Momentalisht, asnjë opsion nuk është përjashtuar nga tavolina.”
Ish-sulmuesi i Anglisë, Gabby Agbonlahor, është i mendimit se United duhet të shesë Ronaldon verën e ardhshme, për t’i lënë hapësirën e nevojshme yjeve të tjerë në skuadër. Ky është dhe mendimi i shumë analistëve të tjerë sportivë, të cilët gjithashtu mbështesin idenë e Agbonlahor, duke thënë se Greenwood, Sancho dhe Rashford do të kenë më shumë hapësira për të shkëlqyer, në rast se CR7 liron vendin e tij në sulm.