Një surprizë që nuk e priste askush ishte eleminimi i Francës nga Euro 2020. “Gjelat” u duk se ishin në rrugën e duhur për të siguruar vendin e tyre në çerekfinale, pas golave të Karim Benzema dhe super-golit nga distanca të Paul Pogba. Por, zvicerianët arritën të shënonin 2 herë në fund të takimit, duke e çuar ndeshjen në shtesë. 30 minutat ekstra nuk nxorrën asnjë fitues, dhe nga pika e bardhë e 11-metërshit, ishte Kylian Mbappe i cili humbi penalltinë vendimtare, duke skualifikuar kështu Francën nga kompeticioni.
Jose Mourinho është i mendimit se trajneri Deschamps bëri një gabim taktik që i kushtoi shumë skuadrës franceze. Sipas portugezit, vendimi për të zëvëndësuar Antoine Griezmann me Moussa Sissoko ishte mjaft i nxituar nga ana e francezit. Mourinho u shpreh për talkSPORT:
“Ata po luanin në mënyrë fantastike (Franca). Goli i parë i Benzema ishte i jashtëzakonshëm, goli i Pogba po ashtu. Por, mendoj se filluan të argëtoheshin përpara kohe. Besoj se Deschamps bëri një gabim për të cilin jam menduar disa herë. Kur je në një ndeshje dhe ekziston mundësia e kohës shtesë, duhet të jesh shumë i kujdesshëm me ndryshimet që bën.”
Trajneri portugez shtoi:
“Kur bën një ndryshim në minutën e 89’, dhe heq nga loja një nga lojtarët e tu më të mirë si Griezmann, dhe e zëvëndëson me Sissoko ka një problem.
Nëse është ndeshje me pikë dhe pa kohë ekstra në rregull, por nëse është mundësia e kohës shtesë është ndryshe. Nëse kundërshtari barazon në minutën e 91’ apo 92’ pastaj do “të vrasësh veten” pasi ke lënë jashtë loje për 30 minuta Griezmann. Në kohën ekstra nuk mund të parashikosh as dëmtimin e Benzema dhe kështu humbet 2 lojtarët e tu kryesorë në sulm.”
Ndryshe nga zakonisht, portugezi ishte i butë në kritikat e tij. Mourinho nënvizoi faktin se Deschamps bëri një gabim, por theksoi se kjo është diçka që mund t’i ndodhë të gjithëve. Sipas tij, eksperienca të tilla janë ato që ndihmojnë trajnerët.