Performancat fantastike dhe konsistente me Borussia Dortmund, duke se e kanë kthyer Jude Bellingham, në sensacionin e momentit në arenën europiane të futbollit. 18 vjeçari shihet si e ardhmja e kombëtares angleze, dhe profili i tij si futbollist ka risjellë në kujtesën e tifozëve lojtarë si Steven Gerrard apo Cesc Fabregas.
Trajneri i “3 Luanëve”, Gareth Southgate, la jashtë skuadrës Jude Bellingham, në ndeshjet e fundit të vlefshme për kualifikueset e Botërorit. Por kjo nuk është aspak një shenjë e keqe për talentin. Mësohet se Southgate ka vendosur t’i lërë kohë për t’u rikuperuar mesfushorit, dhe pavarësisht mos-aktivizimit në takimet e fundit, vendi i tij si titullar në përfaqësuese është i padiskutueshëm.
Shumë analistë e shikojnë si të gabuar nga ana e Southgate, vendimin për të lënë jashtë Bellingham në finalen e Euro 2020 përballë Italisë. James Horncastle u shpreh për BBC Sport:
“Ekziston një ide se Anglia nuk i shfrytëzoi siç duhej lojtarët e saj, dhe më shumë futbollistë të rinj duhet të aktivizoheshin që në fillim. Kjo vlen për Jude Bellingham, por dhe për Jadon Sancho. Gjithsesi, ky nuk është fundi i rrugëtimit, është fillimi i diçkaje të re për Anglinë, me Bellinghamin në krye të kësaj.”
Sipas reporterit të Bundesliga, Archie Rhind-Tutt, Bellingham ka një energji “ngjitëse” tek lojtarët e tjerë, si në fushë ashtu dhe jashtë saj. Talenti i anglezit padyshim është vënë re dhe nga shokët e tij të ekipit. Mats Hummels ka thënë se ka deklaruar 25 herë “dashurinë” e tij për mesfushorin, ndërsa Marco Reus ka thënë se Bellingham i kujton Steven Gerrard, me vendosmërinë e tij për të vrapuar përpara.
Sipas Rhind-Tutt, lojtari bie shpesh herë pre e emocioneve të tij. Por stafi i Dortmund është mësuar me këtë gjë, duke i dhënë atij kohën e duhur për t’u qetësuar.