“Nuk ka asnjë dyshim që për 2 ose 3 vite, do t’i referohemi atij si një nga 5 futbollistët më të mirë në botë.” Këto ishin fjalët e gazetarit sportiv, Guillem Balague, për talentin e Borussia Dortmund, Jude Bellingham. Mesfushori është bërë një lojtar i rregullt në formacionin bazë të Anglisë së Gareth Southgate. Për më shumë, Bellingham ka shënuar gol në Champions League dhe është bërë pjesë e skuadrës së sezonit në Bundesliga. Por çfarë rezervon e ardhmja për superstarin e Dortmund?
Që kur Bellingham iu bashkua Dortmund nga Birmingham City në 2020-ën, asnjë lojtar adoleshent nuk ka luajtur më shumë ndeshje në 5 kampionatet kryesore në Europë. Kjo pritet të vazhdojë dhe në sezonet e ardhshme, duke parë rendimentin e lartë të 19 vjeçarit. Mesfushori fitoi menjëherë vendin e titullarit tek Borussia Dortmund, dhe që prej atij momenti nuk e ka humbur asnjëherë.
Por sipas të gjitha gjasave, lojtari nuk do të kalojë të gjithë karrierën e tij profesionale tek klubi gjerman. Dortmund ka qënë historikisht një shtëpi talentesh, të cilët eventualisht janë larguar nga Signal Iduna Park. Mes tyre mund të përmendim Ousmane Dembele, Christian Pulisic, Jadon Sancho dhe sigurisht Erling Haaland. Bellingham ndërkohë ka një kontratë aktive deri në vitin 2025 me klubin gjerman, por me shumicën e klubeve europiane të interesuara për kartonin e anglezit, sipas të gjitha gjasasve ky do të jetë sezoni i fundit i lojtarit në Gjermani.
Gazetari gjerman, Raphael Honigstein, u shpreh:
“Ai do të jetë Haaland i verës së ardhshme. Dortmund do të shpresojë që ai të qëndrojë pak më gjatë. Para disa muajsh, vet ai (Bellingham) u shpreh se nuk ka për qëllim të largohet, dhe se ndihet i lumtur këtu. Por Dortmund nuk mund ta fshehë më talentin e lojtarit, sidomos nëse ai performon njësoj dhe në Kupën e Botës.”
Honigstein gjithashtu vuri në dukje aftësinë e Bellingham për t’u përshtatur në çdo model loje, gjë që shton akoma më shumë interesin për kartonin e talentit anglez. Gjithçka mbetet për t’u parë është se cili do të jetë destinacioni i tij i rradhës.