Trajneri i Liverpool, Jurgen Klopp është shprehur se kombëtarja hollandeze do të rrezikonte karrierën e Virgil Van Dijk, nëse do të thërriste lojtarin për ndeshjet e Euro 2020. Mbrojtësi i Liverpool ka qenë jashtë fushave të blerta që prej muajit tetor, pas një dëmtimi të rëndë në gju. Që pas këtij momenti, Van Dijk është shfaqur në rrjetet sociale duku punuar fort për një rikuperim sa më të shpejtë.
Fillimisht mendohej se mbrojtësi do të ishte i gatshëm për Liverpool, para mbylljes së sezonit. Por mesa duket, kjo nuk ka për të ndodhur. Gjithsesi, shpresat ngelen ende të larta që hollandezi të luajë për kombëtaren e tij në Euro 2020. Por, pavarësisht optimizmit, duket se Jurgen Klopp nuk është aspak fans i kësaj ideje.
Trajneri gjerman i ka bërë thirrje përfaqësueses hollandeze që të mos mundohet të shpejtojë procesin e rikuperimit të lojtarit. Sipas tij, kjo gjë është e rrezikshme dhe mund të ketë pasoja të rënda në të ardhmen. Klopp u shpreh për mediat:
“Nuk dua që ta pengoj Virgil, por as nuk mund t’i bësh gjërat me forcë.
Jurgen Klopp
Duhen javë të tëra…Jo një javë e vetme. Nuk mund të jesh jashtë fushave për 10 apo 11 muaj, të stërvitesh për një javë, dhe më pas të luash futboll. Kjo nuk është e mundur, nuk duhet të jetë. I premtoj të gjithë holandezëve se askush nuk po e ndalon Virgil. Po flasim për një lojtar dhe karrierën e tij, prandaj askush nuk ka të drejtë të imponohet dhe askush nuk do ta bëjë.”
Trajneri i Hollandës, Frank de Boer, duhet të konfirmojë 26 emrat e përzgjedhur prej tij për Euro 2020, përpara datës 1 qershor. Numri 1 i pankinës së “Tulipanëve” ka insistuar disa herë se vendimi për grumbullimin apo jo të Van Dijk i takon vetëm lojtarit. Duke qenë se ka ngelur më pak se 1 muaj nga konfirmimi i listës së lojtarëve, së shpejti pritet një vendim zyrtar për gjigandin e mbrojtjes së “The Reds”.
