Italianët e Juventus po shpresojnë të gjejnë një ekip, të interesuar në shërbimet e Aaron Ramsey. “Zonja e Vjetër” kërkon që të shesë futbollistin në merkaton e janarit, pasi mesfushori nuk ka arritur të ketë impaktin e duhur me bardhezinjtë, që prej transferimit të tij në Itali. Thënë këto, rikthimi në Angli duket opsioni më i mundshëm për 30 vjeçarin.
Por cilat janë ekipet e interesuar në shërbimet e tij?
Sipas raportimeve më të fundit, Everton dhe Newcastle janë të interesuar për kartonin e futbollistit, por momentalisht, asnjë ofertë zyrtare nuk është bërë nga këto 2 ekipe. Kjo dhe për shkak të Juventus, që sipas gazetarëve italianë, është ende në mëdyshje kur vjen fjala te Ramsey.
Lojtari ka një kontratë aktive me klubin deri në vitin 2023, dhe trajneri Massimiliano Allegri i ka dhënë atij, çdo shanc për të treguar se e meriton një vend titullari te “Zonja e Vjetër”. Por dëmtimet e kanë penguar uellsianin që të shfaqë më të mirën e tij. Gjatë këtij sezoni, Aaron Ramsey ka zhvilluar vetëm 5 paraqitje me Juventus, në të gjitha kompeticionet.
Por problemet me dëmtimet kanë qënë shumë më të pakëta në numër gjatë aktivizimit të mesfushorit me kombëtaren e Uellsit. Kjo gjë lë të nënkuptohet se fiziku dhe nivelet e përgjithshme të fitness-it tek lojtari, nuk po menaxhohen si duhet në nivel klubi.
Një tjetër arsye e largimit të mundshëm të Ramsey nga Juventus, është pëlqimi që trajneri Allegri ka për Miralem Pjanic. Ky i fundit është lojtar i Barcelonës, por trajneri Allegri, në një intervistë për Sport Mediaset, nuk e përjashtoi mundësinë e afrimit të tij. Duke qenë se Pjanic mbulon të njejtin pozicion si Ramsey, gjërat do të bëheshin akoma më të vështira për këtë të fundit. Duket se Juventus është në pritje të një oferte të kënaqshme për mesfushorin.