Transferimi i Dusan Vlahovic nga Fiorentina, i kushtoi Juventus plot 67 milionë paundë. Por kjo gjë duket se nuk do të ndalë “Zonjën e Vjetër” për të ndjekur objektiva të tjerë në merkato. Sipas raportimeve të fundit të mediave italiane, juventinët kërkojnë kartonin e asit të Chelsea, Jorginho.
Italiani ka qënë në super-formë përgjatë vitit që lamë pas, por dhe në startin e 2022-shit. Jorginho triumfoi me Chelsea në Champions League, vetëm disa javë përpara se të ngrinte një tjetër trofe, atë të Euro 2020 me kombëtaren italiane. Mesfushori luajti rol kyç gjatë gjithë rrugëtimit të përfaqësueses, dhe si rrjedhojë e paraqitjeve të mira u rendit i treti në çmimet për “Topin e Artë” këtë vit.
Por ish-ylli i Napolit ka vetëm 18 muaj kontratë të mbetur me londinezët, dhe Chelsea mund të përfitojë financiarisht duke shitur kartonin e lojtarit në verë. Kjo pasi pavarësisht paraqitjeve të mira, drejtuesit e Chelsea janë mjaft striktë kur vjen fjala te kushtet e kontratave të reja, për lojtarët mbi 30 vjeç. Kjo do të thotë se në qoftë se italiani kërkon një pagë më të lartë apo përfitime shtesë, kërkesat e tij do të shihen me skepticizëm. Ndërsa Juventus nga krahu tjetër ka dhënë tashmë prova se është i gatshëm të shpenzojë shuma të mëdha, nëse bëhet fjalë për lojtarin e duhur.
Arsye tjetër se përse Chelsea mund të heqë dorë nga Jorginho janë alternativat e shumta në mesfushë. Në këtë repart, Thomas Tuchel ka në dispozicion lojtarë si N’Golo Kante, Mason Mount, Mateo Kovacic dhe Ruben Loftus-Cheek, për të mos përmendur emrat e tjerë të talentuar të akademisë së klubit, të cilët presin rastin për t’u aktivizuar. Conor Gallagher dhe Billy Gilmour të cilët gjithashtu luajnë në të njejtin pozicion, pritet të rikthehen nga klubet ku luajnë si të huazuar.