Manchester City është i interesuar në shërbimet e mesfushorit anglez të Leeds, Kalvin Phillips. Trajneri i “qytetarëve”, Pep Guardiola, ka identifikuar Phillips si zëvëndësuesin potencial të brazilianit Fernandinho, i cili pritet të largohet në verë nga Etihad. Ilkay Gundogan gjithashtu është drejt largimit dhe kjo do të thotë se mesfusha e City do të ketë një boshllëk sezonin e ardhshëm nëse klubi nuk afron një lojtar të ri.
Fillimisht u përfol se City mund të bënte një ofertë për Declan Rice të West Ham, por këta të fundit kërkojnë mbi 100 milionë euro për kartonin e mesfushorit. Kjo shifër është e përballueshme nga City, por drejtuesit e klubit nuk e shohin të natyrshme të shpenzojnë kaq shumë para për Rice.
Kartoni i Phillips ndërkohë vlerësohet në shifrat e 50 milionë paundëve, dhe drejtori sportiv i Manchester City, Txiki Begiristain, mendon se lojtari do t’i përshtatej mjaft mirë modulit të lojës së “qytetarëve”. Kjo është dhe arsyeja se përse drejtuesit e klubit kanë dërguar përfaqësuesit e tyre, disa herë gjatë këtij sezoni, për të parë Phillips në fushën e blertë.
Manchester United gjithashtu ka mbajtur lojtarin e Leeds në monitorim, por klubi ka insistuar disa herë se nuk ka pasur asnjëherë një interesim në terma konkretë nga ana e “Djajëve të Kuq”. Vet Phillips ndërkohë ka bërë të qartë se nuk dëshiron kurrsesi t’i bashkohet United, duke marrë parasysh rivalitetin historik mes tyre dhe Leeds. Në fakt lojtari është shumë i lidhur me klubin ku luan aktualisht, pasi ka suportuar Leeds që kur ishte fëmijë. Por skuadra rrezikon të bjerë nga kategoria, dhe Phillips është i ndërgjegjshëm që duhet të hedhë hapin e rradhës në karrierën e tij. Një fakt i rëndësishëm janë dhe përfitimet financiare, pasi dihet se një transferim tek City do të thotë një rrogë të paktën 3 herë më e lartë për Phillips.
