Kasper Hjulmand i pakënaqur me penalltinë e akorduar për Anglinë

Trajneri i Danimarkës, Kasper Hjulmand, ka pranuar hapur pakënaqësitë e tij pas eleminimit të Danimarkës nga Anglia, në gjysmëfinalet e Euro 2020. Takimi rezultoi një tjetër përballje që shkoi në kohë shtesë, me Harry Kane që konvertoi në gol një penallti të kontestuar, për t’i dhuruar kualifikimin “3 Luanëve”.

Fillimisht Kasper Schmeichel ndali topin e Kane nga pika e bardhë, por, sulmuesi i Tottenham arriti të dërgojë në rrjetë topin e devijuar. 11 metërshi u kontestua nga lojtarët danezë për faktin se në kohën e ndërhyrjes së gabuar, në fushë ndodheshin 2 topa. Të njejtën gjë nënvizoi dhe trajneri i Danimarkës, i cili gjithashtu beson se ndërhyrja nuk ishte e gabuar. Hjulmand deklaroi pas eleminimit:

“Ishte një penallti e cila nuk duhej të ishte penallti. Është diçka që më acaron në këto momente. Jemi shumë të zhgënjyer.”

Trajneri shtoi:

“Është gjë tjetër të humbasësh një ndeshje, ajo ndodh, por të humbasësh në këtë mënyrë është zhgënjyese sepse lojtarët kanë luftuar shumë.

Është e trishtë por duhet ta gëlltisim këtë gjë përpara se të diskutojmë. Mënyra sesi humbëm na e bën akoma më të vështirë të kuptojmë arsyen se përse u mundëm. Duhet të tregohem i kujdesshëm me ato që them. Kemi një grup fantastik dhe padyshim mund të bëjmë diçka madhore përsëri.”

Hjulmand gjithashtu uroi trajnerin e Anglisë, Gareth Southgate për fitoren e arritur, e cila duhet thënë se është e një rëndësie mjaft të madhe për anglezët. Ndeshja përballë Italisë do të jetë e para finale në një kompeticion madhor për “3 Luanët”, pas plot 55 vitesh. Hjulmand u shpreh:

“Dua të uroj kolegun tim Gareth. E kam ndejkur sesi ai punon me lojtarët e rinj, si përfshihet dhe si sillet me talentet që ka. Mënyra se si ai komunikon është fantastike. Urime Gareth, po bën një punë mjaft të mirë në një profesion të vështirë.”