Sulmuesi i Bayern munich dhe kombëtares së Senegalit, Sadio Mane, do të humbasë Kupën e Botës për shkak të një dëmtimi të marrë gjatë sfidës përballë Werder Bremen në Bundesliga. Federata e futbollit e Senegalit u shpreh ditën e martë se futbollisti do të humbiste takimet e para të fazës në grupe, por një ekzaminim i fundit ka treguar se shkalla e dëmtimit është më e rëndë nga ç’ishte parashikuar në fillim, një lajm vërtet i trishtë për të gjithë fansat dhe adhuruesit e lojtarit.
Mane pritet t’i nënshtrohet një ndërhyrje kirurgjikale në gjur. Senegali ndërkohë do të startojë Kupën e Botës përballë Hollandës, në një përballje mjaft të vështirë ditën e hënë. Afrikanët luajnë në grupin A, ku bën pjesë dhe Ekuadori si dhe organizatorët e Katarit. Pas përballjes me “tulipanët”, senegalezët do të luajnë me Katarin në 25 nëntor, dhe Ekuadorin në 29.
Humbja e Mane është padyshim një goditje e madhe për ekipin e drejtuar nga Aliou Cissé. Sulmuesi i Bayern Munich ka fituar 2 herë titullin e futbollistit më të mirë afrikan, si dhe udhëhoqi kombëtaren e tij drejt triumfit në Kupën e Afrikës, duke mposhtur Egjiptin në finale. Vetëm 2 muaj më vonë Mane shënoi një tjetër penallti deçizive për Senegalin, përsëri ndaj Egjiptit, kësaj rradhe për t’i dhuruar kombëtares së tij një biletë në finalet e Katar 2022.
Paraqitjet fantastike të lojtarit bënë që ai të renditej i dyti në rradhë pas Karim Benzema, në renditjen e Topit të Artë për sezonin që lamë pas.
Gjithsesi, pavarësisht mungesës së Mane, Senegali ka talente të tjera në organikën e vet, mes të cilëve mund të përmendim Edouard Mendy, Kalidou Koulibaly si dhe Ismaila Sarr, dhe këta të fundit duhet të marrin tashmë një përgjegjësi akoma më të madhe mbi supe.