Mesfushori belg Kevin de Bruyne, sipas të gjitha gjasave do të humbasë takimin hapës të Premier League, mes ekipit të tij Manchester City dhe Tottenham. 30 vjeçari ende nuk është kthyer në stërvitje me qytetarët, që prej dëmtimit në gju që pësoi gjatë Euro 2020. Numri 1 i pankinës së City, Pep Guardiola dha më shumë detaje mbi situatën:
“Ai po përmirësohet dita-ditës por jemi ende në pritje. Ai nuk mund të zhvillojë seancat e plota stërvitore. Do të shikojmë se çfarë do të ndodhë në ditët në vijim.”
Por De Bruyne nuk është i vetmi lojtar i City që do të humbasë javën e parë të Premier League. Shoku i tij i skuadrës Phil Foden gjithashtu nuk do të jetë i disponueshëm për trajnerin Guardiola. Lojtari është duke u rikuperuar nga një dëmtim në këmbë.
Ndërkohë nga Franca, duket se Lionel Messi nuk do të debutojë me Paris St-Germain, në ndeshjen përballë Strasbourg ditën e diel. Argjentinasi duket se do të marrë kohën e tij për t’u përshtatur më mirë me lojtarët dhe ambientin e ekipit. Të njejtën gjë konfirmoi dhe trajneri Mauricio Pochettino:
“Do t’i marrim gjërat hap pas hapi dhe do t’i lëmë kohë lojtarëve që të njihen më mirë me njëri-tjetrin. Prioriteti është që ai (Messi) të ndihet mirë, dhe kur të jetë në gjendjen më të mirë fizike të zbresë në fushë. Unë dua të kem në skuadër lojtarët më të mirë, ashtu si çdo trajner. Dhe të gjithë e dinë se Messi është një nga më të mirët në botë.”
Superstari argjentinas pritet të prezantohet përpara fansave së bashku me super-blerjet e tjera të PSG: Sergio Ramos, Gianluigi Donnarumma, Georginio Wijnaldum dhe Achraf Hakimi. Atmosfera pritet të jetë e zjarrtë në Parc des Princes.
