Shancet që Kevin de Bruyne të aktivizohet në ndeshjet e Euro 2020 janë ende të paqarta, por do të bëhen të ditura së shpejti. Këto kanë qenë fjalët e trajnerit të kombëtares belge, Roberto Martinez. Mesfushori i talentuar i Manchester City pësoi një frakturë në hundë dhe në syrin e majtë, gjatë një përplasje me lojtarin e Chelsea Antonio Rudiger, në finalen e Champions League.
Dëmtimi i mesfushorit mund të jetë vendimtar për fatin e Belgjikës në Europian, duke marrë parasysh se De Bruyne është një nga lojtarët më të mirë të ekipit. Në fakt, futbollisti i talentuar shërben si një busull orientimi për shokët e tij të skuadrës, dhe mungesa e mundshme e tij mund të detyrojë trajnerin Martinez të ndryshojë modelin e lojës. Në një deklaratë për mediat, numri 1 i pankinës belge u shpreh mbi situatën:
“Kam folur me Kevin dhe ai është mjaft pozitiv. Duhet të jemi shumë të kujdesshëm, por do të mësojmë më shumë në ditët në vijim.”
Trajneri gjithashtu shtoi:
“Nuk e dimë nëse ai (De Bruyne) do të jetë i gatshëm në ndeshjen e parë. Nuk mund të jap një përgjigje pasi për momentin nuk kam asnjë raport dhe fakt mjekësor. Ende po analizojmë dëmtimin dhe në 4 apo 5 ditët e ardhshme duhet të jemi më të qartë. Jemi me fat sepse megjithëse ka marrë një frakturë të dyfishtë, nuk është nevoja e operacionit. Një operacion do t’ia bënte të pamundur të merrte pjesë në Europian.”
29 vjeçari i Manchester City deklaroi ditën e diel nëpërmjet rrjetit social Twitter se ndihej mirë. Deri tani, nga informacionet që janë bërë publike me shumë gjasa De Bruyne do të jetë pjesë e kombëtares Belge në Euro 2020. Në dyshim ngelet vetëm aktivizimi i tij në ndeshjen e parë në datë 17 qershor, përballë Rusisë.