Trajneri i Liverpool, Jurgen Klopp, e ka cilësuar si një “lojë të pistë” fitoren 3-2 ndaj Atletico Madrid në Champions League. Gjithsesi, gjermani tha se këto lloj fitoresh janë më të rëndësishmet në futboll.
Në një klasike europiane, Atletico ia doli të përmbyste avantazhin 2-0 të anglezëve, por në fund, ishte përsëri Liverpool që triumfoi me rezultatin 3-2. Por kartoni i kuq i Antoine Griezmann dhe vendimet e kontestuara të VAR, bënë që takimi të karakterizohej nga tensione të larta, të cilat vazhduan dhe pas mbylljes së lojës.
Ndërkohë Klopp u shpreh i lumtur për fitoren dhe deklaroi:
“Ishte një ndeshje e vështirë. Në qoftë se tregohem i sinqertë, nuk më intereson fare sesi fituam. Fitoret “e pista” janë ato më të rëndësishmet. Në një natë si kjo, marrja e 3 pikëve është një gjë mjaft e rëndësishme.”
Tekniku shtoi:
“Penalltia jonë ishte penallti e rregullt. Dhe penalltia tjetër (e akorduar për Atletico) nuk ishte e tillë, por nuk e shoh shpesh herë që VAR-i të kthejë pas një vendim. Nuk e prisja por mendoj se ishte vendimi i duhur. Kartoni i kuq ishte disi i pafat, por mbetet një karton i kuq. Takat në fytyrë dhe ndërhyrje të tjera si kjo janë të ndëshkueshme me karton të kuq, dhe këtë gjë e kemi parë në të kaluarën.”
Pas ndeshjes, trajneri i Atletico Madrid, Diego Simeone, u fut nxitimthi tek tuneli dalës, pa i dhënë dorën Jurgen Klopp. Ky i fundit tha se veprimi i argjentinasit nuk ishte i duhuri, por gjithsesi arrin të kuptojë tensionin e momentit në fjalë:
“Situata është e qartë. Unë doja t’i jepja dorën, ai jo. Reagimi i tij nuk ishte i duhuri, por dhe i imi nuk ishte më i miri i mundshëm. Jemi të dy shumë emocionalë, por herën tjetër që do ta takoj patjetër që do të shtrëngojmë duart. Ai (Simeone) ishte i inatosur, jo me mua, por me ndeshjen. Nuk ka asgjë tjetër.”
