Kur Gareth Southgate bëri të ditur listën e të grumbulluarve pranë kombëtares së “3 Luanëve”, javën e kaluar, reagimet ishin nga më të ndryshmet. Shumë analistë sportivë u shprehën se tekniku i ka besuar më shumë sesa duhet, lojtarëve që nuk kanë qënë në formën e tyre më të mirë së fundmi. Të tjerë komentuan se Southgate ka bërë zgjedhjen e duhur, duke qënë se grupi aktual i lojtarëve nuk e ka zhgënjyer asnjëherë.
Pavarësisht opinioneve të ndryshme, konkurrenca e lartë për një vend në kombëtaren angleze, ka bërë që shumë pozicione në formacionin bazë të skuadrës, të kthehen në objekt diskutimi. Por cilat janë pikat kyç që kanë ndarë në dy krahë fansat dhe opinionin sportiv?
Përfshirja e Harry Maguire ka qënë një nga pikat më të diskutuara, teksa lojtari është lënë në stol tek Manchester United nga trajneri Ten Hag. Statistikisht, Conor Coady i Everton dhe Ben White i Arsenal kanë performuar shumë më mirë sesa Maguire këtë sezon, por asnjë prej të dyve nuk bën pjesë tek të zgjedhurit e Southgate. Arsyeja kryesore mendohet të jetë mungesa e eksperiencës në nivel internacional.
Një tjetër vendim mjaft i komentuar ka qënë përfshirja në ekip e Luke Shaw në repartin e mbrojtjes. Ky i fundit, po njësoj si Maguire, ka hasur vështirësi serioze në nivel klubi këtë sezon. Southgate gjithashtu ka përzgjedhur Ben Chilwell të Chelsea, megjithëse ky i fundit është ende duke u rikuperuar nga një dëmtim, dhe nuk ka luajtur shumë minuta në fushën e blertë me klubin londinez.
Përsa i përket sulmit, aktivizimi i Harry Kane është mëse i sigurt, por duket se Southgate ende nuk ka gjetur opsione të tjera të besueshme në repartin ofensiv. Marcus Rashford nuk ka bindur asnjëherë 100% me paraqitjet e tij me United, ndërkohë që Ivan Toney i Brentford është një opsion i mirë, por lojtari nuk ka eksperiencë në nivelin e kompeticioneve ndërkombëtare. Nga ana tjetër, Jack Grealish dhe Jadon Sancho janë gjithashtu 2 lojtarë mjaft premtues, por sulmuesit kanë prodhuar shumë pak gola në nivel klubi, në javët e fundit.
