Gjermania e Hansi Flick mori një fitore fantastike në transfertë përballë Islandës, në shifrat 4-0. Megjithatë, udhëtimi për në shtëpi, duket se nuk është karakterizuar nga atmosfera festive për gjermanët.
Avioni i përfaqësueses u detyrua të bënte një ulje emergjence në Edinburgh, duke lënë shumë fansa dhe opinionin publik të shqetësuar. Gjithsesi, gjithçka ka shkuar mirë në fund për gjermanët, të cilët u detyruan të presin për rreth 5 orë në kryeqytetin skocez, përpara mbërritjes në shtëpi me një tjetër mjet fluturues.
Shkaku i uljes emergjente ishte “funksionimi me probleme” i gjeneratorit të fuqisë së avionit. Federata Gjermane e Futbollit u tregua mjaft e shpejtë, duke përditësuar situatën në rrjetin social Twitter për të qetësuar tifozët. Federata informoi:
“Fluturimi ynë për në shtëpi është devijuar drejt Edinburghut për të kryer një inspektim sigurie. Të gjithë janë shëndoshë e mirë dhe po presin stafin teknik që po punon me qetësi dhe profesionalizëm. Tani për tani, një kafe tjetër! #DieMannschaft.”
Më pas në një tweet që pasoi, federata njoftoi se një avion tjetër ishte nisur për të marrë lojtarët dhe për t’i dërguar ata në shtëpitë e tyre në Frankfurt dhe Munich.
Gjermania gjendet në krye të grupit J me 15 pikë, 4 pikë më shumë se Armenia e vendit të dytë, kur kanë ngelur dhe 4 takime për t’u luajtur. Përballja me Islandën shënoi një performancë mjaft të mirë për dyshen e Chelsea, Antonio Rudiger dhe Timo Werner. Të dy lojtarët gjetën rrugën e rrjetës, teksa golashënues të tjerë ishin dhe lojtarët e Bayern, Serge Gnabry dhe Leroy Sane.
Duket se kapitulli Flick te përfaqësuesja gjermane premton vërtet shumë. Pas dy viteve të cilësuara si një periudhë stanjacioni për “panzerat”, skuadrës i është rikthyer freskia. Prurjet e reja në skaudër po formojnë dita-ditës identitetin e tyre, dhe kjo është një garanci për të ardhmen e kombëtares gjermane.
