Pep Guardiola do të ketë shansin për të realizuar ëndrrën e tij, kur të vijë momenti i largimit nga Manchester City. Spanjolli e ka shprehur publikisht disa herë, dëshirën e tij për të qënë trajneri i një kombëtareje, dhe oferta sapo ka ardhur nga përfaqësuesja holandeze. Federata e futbollit të “tulipanëve” po planifikon një strategji konkrete për të joshur teknikun që të pranojë propozimin.
Guardiola ka një kontratë aktive me Manchester City, deri në fund të sezonit të ardhshëm, pra gati dhe 1 vit e gjysmë. Drejtuesit e Etihad shpresojnë që spanjolli të rinovojë kur të vijë momenti, por kjo gjë duket se nuk i ka trembur drejtuesit e federatës hollandeze të futbollit.
Deri më tani, Pep nuk ka dhënë sinjale se do të largohet nga City, të paktën në planin afatshkurtër. Së fundmi, trajneri u pyet nëse ishte i interesuar që një ditë të merrte nën drejtim kombëtaren angleze, nëse kjo është e mundur. Por tekniku zgjodhi të mos komentonte. Ndërsa përsa i përket kombëtares spanjolle, sipas të gjitha gjasave Guardiola nuk e dëshiron këtë detyrë. Pep e ka bërë disa herë të qartë suportin e tij për pavarësinë e Katalonjës, dhe qëndrimi i tij politik do të binte ndesh me postin e tij në krye të Spanjës.
Por Hollanda është ndryshe. Legjenda hollandeze Johan Cruyff është një nga heronjtë e spanjollit, dhe lidhja sentimentale ka ndikim të fortë tek Guardiola. Cruyff ishte trajner i Barcelonës në kohën kur Guardiola aktivizohej si lojtar me katalanasit. Nën drejtimin e tij, Pep jo vetëm që u kthye në një nga mesfushorët difensivë më të mirë të kohës, por formoi dhe filizofinë e tij të futbollit, bazuar fort tek futbolli total i Johan Cruyff.
Momentalisht në krye të Hollandës ndodhet Louis van Gaal. Por trajneri 70 vjeçar pritet t’i hapë rrugë pasardhësit të tij, pas botërorit të Katarit.