Franca e Didier Deschamps nuk ka shkuar më shumë se barazimi 1-1 përballë Ukrainës. Ky është barazimi i 5-të rradhazi për kombëtaren e “gjelave”, të cilët duket se ende nuk kanë gjetur ritmin e duhur, që prej eleminimit surprizë nga Zvicra në Euro 2020.
Ishin ukrainasit ata që kaluan të parët në avantazh me Mykola Shaparenko. Mesfushori goditi mjaft saktë nga distanca në minutën e 44’, duke i dhuruar golin skuadrës së tij. Franca gjeti më vonë golin e barazimit me Anthony Martial. Ky i fundit shënoi kështu golin e tij të dytë me përfaqësuesen franceze, dhe të parin për të që prej vitit 2016.
Francezët mund të konsiderohen deri diku të pafatë, teksa goditja e Moussa Diaby u ndal në shtyllë, pas pasimit të ardhur nga Karim Benzema. Ky mund të ishte goli që do t’i dhuronte fitoren miqëve, por të besuarit e Deschamps duhet të kënaqen përsëri me barazimin.
Ndërkohë nga ana tjetër, Hollanda siguroi një fitore të rëndësishme përballë Malit të Zi në shifrat 4-0. Ishte Memphis Depay ai që gjeti 2 herë rrjetën fillimisht për “tulipanët”. Më pas golat e Wijnaldum dhe Gakpo vulosën fitoren për të besuarit e Louis van Gaal.
Mali i Zi pati shancet e tij për shënim, kryesisht nga pakujdesitë e mbrojtjes vendase. Megjithatë, miqtë shpërdoruan shumë prej mundësive që patën. Stefan Mugosa humbi rastin më të pastër për malazezët, teksa në një distancë shumë të afërt me portën dërgoi topin në mënyrë të pafalshme jashtë loje.
Kjo ishte fitorja e parë e Louis van Gaal në drejtimin e Hollandës. Trajneri do të shpresojë që kësaj rradhe, të drejtojë një fushatë më të suksesshme se ato të mëparshmet me kombëtaren, ku nuk arriti dot t’i udhëhiqte “tulipanët” drejt një trofeu madhor ndërkombëtar.
