Kualifikueset e Botërorit 2022 tashmë janë rikthyer, dhe vëmendja më e madhe mbetet tek ekipet “big” të Europës. Gjithsesi, duket se kampionët në fuqi të Francës, si dhe “tulipanët” e Louis van Gaal, kanë zhgënjyer në takimin e parë të kësaj fushate kualifikuese, pas rikthimit nga pushimet verore.
Franca nuk shkoi më shumë se një barazim me Bosnia-Herzegovina në shifrat 1-1. Ishte sulmuesi Edin Dzeko, që me eksperiencën dhe teknikën e tij, i dha avantazhin boshnjakëve, me një goditje të bukur nga jashtë zone. Megjithatë, Antoine Griezmann i dhuroi barazimin “gjelave” duke barazuar shifrat në minutën e 39’, vetëm 3 minuta pas golit të Dzeko.
Francezët i penalizoi shumë dhe largimi me karton të kuq i Kounde në minutën e 51’. Këtë gjë e konfirmoi dhe trajneri Didier Deschamps, i cili u shpreh:
“Sigurisht që është më e vështirë me 10 lojtarë. Patëm disa mundësi, por ky nuk ishte rezultati që kërkonim.”
Ndërkohë, Hollanda e drejtuar nga Louis van Gaal u ndal në barazim 1-1 përballë Norvegjisë. Hollandezët u gjendën në disavantazh, teksa talenti Erling Braut Haaland shënoi duke i dhënë avantazhin nordikëve. Barazimi erdhi pas goditjes së bukur të Davy Klaassen, i cili arriti të shfrytëzojë mjaft mirë një krosim të Wijnaldum. Pavarësisht kësaj, “tulipanët” për pak sa nuk e humbën takimin, por për fatin e tyre të mirë, goditja e Erling Braut Haaland u ndal nga shtylla.
Kjo është hera e tretë që Van Gaal është në krye të kombëtares hollandeze të futbollit. 70 vjeçari ka drejtuar përfaqësuesen nga viti 2000 deri në 2002, dhe nga 2012 deri në 2014, por pa arritur të fitojë një trofe madhor me skuadrën. Konkurrenca në grupin G ku ndodhen hollandezët është e ashpër, me Turqinë që mban kreun e grupit me 8 pikë, e ndjekur nga Hollanda, Mali i Zi dhe Norvegjia, secila me 7 pikë.
